ᓇᐃᑦᑐᒃᑯᑦ ᑭᐅᓗᒍ:

ᐋᒡᒐ, ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᕿᓂᒃᑰᙱᑦᑐᖅ.  ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᖃᑭᒍᑎᒃᓴᓕᐅᙱᑦᑐᖅ ᐊᔭᐅᕆᕙᒃᑐᓂ ᐊᒻᒪᓗ ᓄᓇᓕᓐᓂ ᓯᕗᓕᖅᑎᐅᔪᖅ ᐱᒋᐊᖅᑎᑦᑎᓲᖅ ᐊᐅᓚᑦᑎᓲᖑᓪᓗᓂᓗ ᐱᓕᕆᐊᓂᑦ, ᓇᓕᒧᒌᓕᖅᑎᑦᑎᓲᖑᓪᓗᓂᓗ ᒐᕙᒪᑐᖃᒃᑯᓐᓂ ᑮᓇᐅᔭᖅᑎᒍᑦ ᐃᑲᔫᑎᒋᕙᒃᑕᖏᓐᓂᒃ ᓄᑭᓪᓚᐅᑎᓕᕆᓂᕐᒧᑦ ᐃᑭᐊᖅᑭᔾᔪᑎᓂᑦ ᐱᔨᑦᑎᕋᕈᑕᐅᓂᐊᖅᑐᓂᑦ ᑕᒪᒃᑯᐊ ᐊᑐᐃᓐᓇᐅᒪᓕᖅᑎᑕᐅᓲᖑᓪᓗᑎᑦ ᓇᒻᒥᓂᖃᖅᑐᓄᑦ.  ᕿᓂᒃᑯᑦ ᓄᓇᕗᓕᒫᕐᒥ ᐃᑭᐊᖅᑭᔾᔪᑎᓂᑦ ᑲᓱᖅᑕᐃᑎᑦᑎᓲᖅ ᐊᐅᓚᑕᐅᓪᓗᓂ SSI Micro-ᒃᑯᓐᓄᑦ ᐊᑭᑦᑐᕋᐅᑎᓂᒃᑯᑦ ᓵᓚᖃᓚᐅᖅᓯᒪᔪᖅ ᑳᓐᑐᕌᒃᑦ−ᒥ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓᑕ ᐱᒋᐊᖅᑎᓚᐅᖅᓯᒪᓪᓗᓂᐅᒃ ᑕᒪᓐᓇ 2003−ᖑᑎᓪᓗᒍ ᐃᑭᐊᖅᑭᔾᔪᑎᖃᖃᑦᑕᖁᓪᓗᒋᑦ ᑖᒃᑯᐊ 25-ᖑᔪᑦ ᓄᓇᓕᓕᒫᑦ ᓄᓇᕗᒥ.  ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐱᓕᕆᐊᖃᓚᐅᖅᓯᒪᕗᖅ ᒐᕙᒪᑐᖃᒃᑯᓐᓂᑦ ᑮᓇᐅᔭᖅᑖᕆᐊᙵᖅᑐᓂ ᐊᒻᒪᓗ ᐊᑭᓕᒃᓴᖅᑖᖅᑐᑎᑦ ᑮᓇᐅᔭᖃᕐᓂᐊᕐᒪᑕ ᕿᓂᖅ ᐃᑭᐊᖅᑭᔾᔪᑎᓕᕆᔨᒃᑯᑦ ᓴᓇᔭᐅᖁᓪᓗᒍ ᐊᐅᓚᑕᐅᖁᓪᓗᒍᓗ ᑭᓯᐊᓂᓕ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐊᐅᓚᑦᑎᓲᖑᙱᑦᑐᖅ ᐃᑭᐊᖅᑭᔾᔪᑏᑦ ᐊᐅᓚᑕᐅᓂᖏᓐᓂᑦ ᐊᒻᒪᓗ ᑮᓇᐅᔭᖅᑖᓲᖑᙱᑦᑐᖅ ᐃᑭᐊᖅᑭᔾᔪᑎᑖᓲᓂᑦ.

ᑕᑭᔪᒃᑯᑦ ᑭᐅᓗᒍ:

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐱᙳᖅᑎᑕᐅᓚᐅᖅᓯᒪᕗᖅ 2002-ᖑᑎᓪᓗᒍ ᑮᓇᐅᔭᖅᑖᕐᓂᐊᕐᓗᓂ ᐃᑲᔫᑎᓂᑦ ᒐᕙᒪᑐᖃᒃᑯᓐᓂᑦ ᐋᖅᑭᓱᖅᑕᐅᖁᓪᓗᒍ ᐃᑭᐊᖅᑭᔪᓐᓇᐅᑎᓕᕆᔾᔪᑏᑦ ᑕᒪᐃᓐᓂ ᓄᓇᕗᑉ ᓄᓇᓕᖏᓐᓂᑦ.  2003-ᖑᑎᓪᓗᒍ, ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᑭᙴᒪᒋᔭᐅᔪᑦ ᖃᓄᐃᑦᑑᒻᒪᖔᑕ ᖃᐅᔨᓴᓚᐅᖅᓯᒪᕗᑦ ᐊᒻᒪᓗ ᑎᑎᕋᖅᑐᑎᑦ ᐱᓕᕆᕝᕕᑉ ᐸᕐᓇᐅᑎᖏᓐᓂᑦ ᑐᓂᔭᐅᒐᔭᖅᑐᑦ ᓴᓇᔪᓕᕆᔨᒻᒪᕆᒃᑯᓐᓄᑦ ᑲᓇᑕᒥ ᐃᑭᐊᖅᑭᔪᓐᓇᐅᑏᑦ ᓄᑭᓪᓚᐅᑏᑦ ᐃᑭᐊᖅᑭᔪᓐᓇᐅᑏᑦ ᐅᖓᓯᑦᑐᒥᐅᑕᓄᑦ ᐅᑭᐅᖅᑕᖅᑐᒥᓂᐅᑕᓄᓪᓗ ᐱᕙᓪᓕᐊᖁᓪᓗᒍ ᐱᓕᕆᐊᖓᒍᑦ.  ᐱᓕᕆᕝᕕᑉ ᐸᕐᓇᐅᑎᓕᐊᕆᔭᐅᑎᓪᓗᒍ, ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐃᓄᓐᓂᑦ ᑭᒃᑯᑐᐃᓐᓇᕐᓂᑦ ᐊᑭᑦᑐᕋᐅᑎᖁᔨᓚᐅᖅᓯᒪᕗᖅ ᐊᒻᒪᓗ Ssi Micro ᓂᕈᐊᖅᑕᐅᓚᐅᖅᓯᒪᓪᓗᓂ ᓴᓇᓂᐊᕐᓗᓂ ᐊᐅᓚᑦᑎᓗᓂᓗ ᐃᑭᐊᖅᑭᔾᔪᑎᓕᕆᔾᔪᑎᓂᒃ, ᐱᓇᓱᓚᐅᖅᓯᒪᓂᖏᓐᓄᑦ ᐊᑭᑭᓛᓂᑦ ᐱᔨᑦᑎᕋᕈᓐᓇᕐᓂᐊᖅᑐᑎᑦ.  ᑮᓇᐅᔭᑦ ᓈᒻᒪᒃᓯᓚᐅᖅᐳᑦ ᐅᐱᕐᖔᒥ 2004-ᖑᑎᓪᓗᒍ, ᐊᒻᒪᓗ ᕿᓂᖅ ᓴᖅᑭᖅᑎᑕᐅᓚᐅᖅᓯᒪᓪᓗᓂ ᐊᐅᔭᒃᑯᑦ 2005-ᖑᑎᓪᓗᒍ.  ᑖᒃᑯᐊ ᕿᓂᒃᑯᑎᒍᑦ ᐃᑭᐊᖅᑭᔪᓐᓇᐅᑎᓂᑦ ᐊᑐᕐᓂᐊᖅᑐᑦ ᐊᒥᓱᒻᒪᕆᐅᓚᐅᖅᑐᑦ ᐊᒻᒪᓗ ᕿᓂᑉ ᓂᕆᐅᓐᓂᕆᓚᐅᖅᓯᒪᔭᖏᑦ 9 ᐊᕐᕌᒍᑦ ᐊᓂᒍᕈᑎᑦ ᐊᒥᓲᓛᕐᓂᐊᕋᓱᒋᔭᖏᑦ ᐊᑐᕐᓂᐊᖅᑐᑦ ᓵᒻᒪᒃᓯᓚᐅᖅᑐᑦ 9−ᑕᖅᑭᑐᐃᓐᓇᐃᑦ ᐊᓂᒍᖅᓯᒪᓕᖅᑎᓪᓗᒋᑦ.  2008−ᖑᑎᓪᓗᒍ, ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐊᑎᓕᐅᓚᐅᖅᓯᒪᒋᕗᖅ ᑭᖑᓪᓕᕐᒥ ᑮᓇᐅᔭᖃᖅᑎᑕᐅᓗᑎᑦ ᐃᑲᔫᑎᒃᓴᓂᑦ ᐊᖏᕈᑎᒥᒃ ᐃᑲᔪᖅᑐᐃᓂᐊᕐᓗᓂ, ᐊᓯᖏᓐᓂᐅᒻᒥᔫᒐᓗᐊᖅ, ᐱᕈᖅᐸᓪᓕᐊᓂᖓᓂᒃ ᕿᓂᑉ ᐊᑐᖅᐸᑦᑐᑦ ᑐᙵᕕᖓ ᓱᑲᓐᓂᖓᑕ ᐃᑭᐊᖅᑭᔾᔪᑎᑉ.

2003-2016-ᒥ, ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐊᐅᓚᑦᑎᓯᒪᓛᓕᖅᑐᖅ $66 ᒥᓕᐊᓐ−ᓂᒃ ᐃᑭᐊᖅᑭᔪᓐᓇᐅᑎᓕᕆᔾᔪᑎᓄᑦ ᓄᓇᕗᒥ, ᒐᕙᒪᑐᖃᒃᑯᓐᓂᑦ ᑮᓇᐅᔭᖅᑖᕆᓯᒪᓗᐊᙳᐊᖅᑐᓂᒋᑦ ᐃᑲᔫᑏᑦ, ᐊᑭᓕᒃᓴᓂᑦᑐᑕ ᑮᓇᐅᔭᖃᕈᓐᓇᖅᓱᑕ ᑲᑐᔾᔨᖃᑎᒌᓂᑦ (ᑕᒪᓐᓇᖃᐃ ᐃᓱᒪᒋᔭᒥᓂᐅᒻᒪᑦ ᓇᒻᒥᓂᖃᖅᑐᓃᙶᕋᓱᒋᔭᐅᓪᓗᓂ − ᑭᓯᐊᓂᓕ ᐊᑐᖅᑐᐊᕐᕕᒃᑯᑦ ᓄᓇᕘᒥ ᕿᑭᖅᑖᓗᒃ ᑮᓇᐅᔭᖅᑖᖅᑎᑦᑎᔨᒃᑯᑦ ᑯᐊᐳᕇᓴᙵ ᓇᒻᒥᓂᖁᑎᒋᔭᐅᙱᑦᑑᒃ) ᐊᒻᒪᓗ ᓇᒻᒥᓂᖁᑎᓕᓐᓃᙶᖅᑐᓂᑦ.

ᐊᓯᖏᑦ ᖃᐅᔨᒪᔪᒪᑐᐃᓐᓇᕆᐊᓕᑦᑎᑦ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓᑕ ᒥᒃᓵᓄᑦ:

  • ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐊᐅᓚᑕᐅᕗᖅ ᑮᓇᐅᔾᔭᒃᓴᙱᑦᑐᓄᑦ ᑲᑎᒪᔨᓄᑦ ᓄᓇᕗᒥᐅᑕᐅᓪᓗᑎᑦ.
  • 70−ᐅᔪᑦ ᐃᓚᒋᔭᐅᔪᑦ ᐃᓅᕗᑦ, ᑕᐃᒪᐃᑦᑕᕆᐊᖃᕐᓂᖓᓄᑦ ᒪᓕᒐᕋᓛᑦᑎᒍᑦ;
  • ᐊᒥᓲᓂᖅᓴᑦ ᑲᑎᒪᔨᐅᔪᑦ ᐃᓅᕗᑦ;
  • ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᑕᑎᒃᓴᖅᑐᑦ ᒐᕙᒪᒃᑯᓐᓂᑦ ᑮᓇᐅᔭᖅᑖᖅᑎᑕᐅᖃᑦᑕᕐᓂᑎᓐᓄᑦ ᐊᐅᓚᑦᑎᓗᑕ ᐊᒻᒪᓗ ᐱᓕᕆᐊᖃᕐᓗᑕ ᑲᒪᒋᔭᑦᑎᓐᓂᑦ ᐊᒻᒪᓗ ᑮᓇᐅᔾᔭᒃᓴᙱᑦᑐᑦ ᑖᒃᑯᓂᖓ ᐱᓕᕆᐊᖏᓐᓂᑦ;
  • ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᓂᐅᕕᕐᕕᐅᔪᓐᓇᖅᑐᖅ ᐊᒻᒪᓗ ᖃᕋᓴᐅᔭᓕᕆᔨᐅᔪᑦ ᐃᓛᒃᑰᖓᓪᓗᓂ, ᑐᑭᓕᒃ ᖃᕋᓴᐅᔭᓕᕆᓂᒃᑯᑦ ᐋᖅᑭᒃᓱᐃᕙᙱᑦᑐᒍᑦ ᑭᙴᒪᒋᔭᐅᔪᑦ ᐃᓛᒃᑰᖓᔪᑦ ᑲᒪᒋᕙᙱᑦᑐᑎᒍᑦ ᐃᓄᓐᓄᑦ ᑭᒃᑯᑐᐃᓐᓇᕐᓄᑦ ᑕᐃᒪᐃᑦᑐᒋᔭᐅᖃᑦᑕᕋᓗᐊᖅᑎᓪᓗᑕ;
  • ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐊᑐᓲᖑᔪᖅ ᐃᓄᓐᓂᒃ ᑭᒃᑯᑐᐃᓐᓇᕐᓂᑦ ᑐᒃᓯᕋᐅᑎᓕᐅᖁᔨᓪᓗᓂ ᓂᕈᐊᕈᓐᓇᖁᓪᓗᒋᑦ ᓇᒻᒥᓂᖁᑎᖃᖅᑐᑦ ᐋᖅᑮᖁᔨᓪᓗᑎᑦ ᐊᒃᓱᕈᕈᑕᐅᔪᓂᑦ ᓇᓗᓇᐃᖅᑕᐅᓯᒪᔪᑦ ᐃᓚᒋᔭᐅᔪᖁᑎᖏᓐᓄᑦ.

ᐅᑉᐱᓇᑦᑎᐊᙱᒻᒪᕆᑦᑐᖅ ᑭᓯᐊᓂᓕ ᑲᓇᑕᒥ ᐅᖄᓚᐅᑏᑦ ᐱᔨᑦᑎᕋᕈᑎᐅᓗᑎᑦ ᐊᑐᖅᑕᐅᖃᑦᑕᐃᓐᓇᕆᐊᖃᖅᑐᒋᔭᐅᕗᑦ ᐃᑭᐊᖅᑭᔾᔪᑏᑦ ᑕᐃᒪᓐᓇᑎᒋ ᐃᓱᒪᒋᔭᐅᒐᑎᑦ.  ᖁᓕᑦ ᐊᕐᕌᒎᓕᖅᑐᓂᑦ, ᓄᓇᕗᑦ ᐃᑲᔪᖅᑕᐅᓯᒪᓕᖅᑐᖅ ᐊᔾᔨᒌᙱᑦᑐᑎᒍᑦ ᒐᕙᒪᑐᖃᒃᑯᓐᓂᑦ ᑮᓇᐅᔭᖅᑎᒍᑦ ᐃᑲᔪᖅᑐᖅᑕᐅᕙᓐᓂᖓᓄᑦ ᐃᑭᐊᖅᑭᔾᔪᑎᓕᕆᓂᑉ ᐱᖁᑎᕐᔪᐊᖏᑦ.  ᑮᓇᐅᔭᑦ ᑖᒃᑯᐊ ᐃᑲᔪᕐᓂᖃᖅᓯᒪᓕᕋᓗᐊᖅᑎᓪᓗᒋᑦ ᐃᑭᐊᖅᑭᔾᔪᑎᑖᕐᓗᑎᑦ ᑕᒪᐃᓐᓂᑦ ᓄᓇᕗᑉ ᓄᓇᓕᖏᑦ 2005−ᒥᓂᑦ ᑕᐃᒪᙵᓕᒫᕐᓗ ᐃᑲᔪᖅᑐᖅᑕᐅᖃᑦᑕᕋᓗᐊᖅᑎᓪᓗᒋᑦ, ᓈᒻᒪᙱᓚᑦ ᓄᑖᑦ ᑭᙴᒪᒋᔭᐅᕙᓪᓕᐊᔪᑦ ᐱᓕᕆᐊᕆᔭᐅᔪᒪᔪᓪᓗ ᓄᓇᕗᒥᐅᑦ ᐊᑐᖅᐸᑦᑕᖏᑦ ᐊᒻᒪᓗ ᑭᓯᐊᓂ ᐊᓯᔾᔩᔪᐊᓘᙱᑐᐊᕈᑎᑦ, ᖃᕋᓴᐅᔭᓕᕆᓂᖅ ᐅᑭᐅᖅᑕᖅᑐᒥ ᐊᒻᒪᓗ ᐅᑭᐅᖅᑕᖅᑐᒥ ᖃᓪᓗᓈᓄᑦ ᐊᔾᔨᒌᙱᑎᒋᓂᖓ ᐊᖏᓪᓕᕙᓪᓕᐊᑐᐃᓐᓇᕐᓂᐊᖅᑐᖅ.

ᖃᐅᔨᓴᖅᑕᐅᕋᑖᓚᐅᖅᑐᑦ ᒪᓕᑦᑐᒋᑦ ᖃᐅᔨᓴᖅᑐᒥᓂᐅᓪᓗᑎᑦ ᑲᑎᒪᕕᔾᔪᐊᖅᑎᑦᑎᔩᑦ ᑲᓇᑕᒥ ᐅᑭᐅᖅᑕᖅᑐᒧᑦ, ᓄᓇᕗᑦ, ᑕᐃᒪᐃᖏᓐᓇᐸᓗᑉᐳᖅ, ᐱᔨᑦᑎᕋᖅᑕᐅᓂᖏᑦ ᐊᑭᑐᓛᖑᐃᓐᓇᖅᑐᑦ ᐊᒻᒪᓗ ᐱᔨᑦᑎᕋᖅᑕᐅᓂᖏᑦ ᐊᑦᑎᓛᖑᐃᓐᓇᖅᑐᑎᑦ ᑲᓇᑕᑉ ᓯᓚᑖ ᓴᓂᐊᓂᐊ ᑐᓴᐅᒪᖃᑎᒌᓐᓂᕐᒧᑦ ᖃᕋᓴᐅᔭᓕᕆᓂᕐᒧᓪᓗ ᐱᔨᑦᑎᖅᑕᐅᓂᖏᓐᓄᑦ:  

CFN Connectivity report

ᓄᓇᕗᑉ ᓄᓇᖓ ᐊᖏᔪᐊᓘᓪᓗᓂ (2 ᒥᓕᐊᓐ ᑭᑉᐹᕆᒃᑐᑦ ᑭᓛᒥᑐᔅ - 20%−ᖑᓪᓗᓂ ᑲᓇᑕᑉ ᓄᓇᓕᒫᖓᓂ ᐊᒻᒪᓗ 40%−ᖑᓪᓗᑎᑦ ᑲᓇᑕᑉ ᓯᔾᔭᖏᓐᓂᒃ ᐱᖁᑎᖃᖅᑐᓂ), ᐅᖓᓯᑦᑐᒡᒍᑕᐅᓪᓗᑎᑦ ᖃᑦᑏᓐᓇᐅᓪᓗᑎᓪᓗ ᐃᓄᖏᑦ (33,000 ᐃᓄᖏᑦ 25−ᓃᑦᑐᑦ ᓄᓇᓕᓐᓂ, ᐃᓄᖏᑕ ᐊᒥᓲᓂᖏᑦ ᖃᓂᒌᑦᑐᒡᒍᑕᐃᓂᖅᓴᐅᓪᓗᑎᑦ ᓄᓇᓕᖏᓐᓂ ᑲᓇᑕᒥᓕ ᑕᐃᒪᐃᙱᓐᓂᖅᓴᐅᓪᓗᓂ ᓄᓇᓕᐸᐅᔭᖏᓐᓃᑦᑐᒡᒍᑕᐅᓂᖅᓴᐅᓪᓗᑎᑦ ᐃᓄᖏᑦ), ᐊᒻᒪᓗ ᐊᑭᑐᓗᐊᕐᓂᖓ ᓇᒻᒥᓂᖁᑎᒋᔭᐅᔪᒥᑦ ᐊᐅᓚᑦᑎᓗᓂ ᑕᒪᒃᑯᐊ ᐱᓪᓗᒋᑦ ᐊᑭᑐᔾᔪᑎᒋᖃᑦᑕᖅᑕᖏᑦ ᐱᔨᑦᑎᕋᖅᑕᐅᓂᖏᑕ ᐃᓄᖏᑦ.  ᐊᒻᒪᓗᑦᑕᐅᖅ, ᓄᓇᕗᑦ ᐊᖅᑯᑎᖃᙱᒻᒪᑦ ᑲᓱᖅᑎᑦᑎᓲᓂᑦ ᑲᓇᑕᒥ ᑕᐃᒪᐃᑦᑎᓪᓗᒍ, ᑕᑎᖃᖅᑐᒡᒍᑕᐃᓐᓇᓪᓚᕆᐅᕗᒍᑦ ᖁᒻᒧᐊᑦᑎᑕᐅᓯᒪᓕᕆᔾᔪᑎᓂᑦ ᑐᓴᐅᒪᖃᑎᒌᒍᑎᑦᑎᓐᓄᑦ ᑕᒪᐃᓐᓄᑦ ᐱᔨᑦᑎᕋᕈᑎᓄᑦ.  ᐊᒻᒪᓗ ᑭᖑᕚᕆᔭᐅᓂᐊᖅᑐᑦ ᖁᒻᒧᐊᑦᑎᑕᐅᔾᔪᑎᓕᕆᔾᔪᑎᑦ ᑲᓱᖅᑎᑦᑎᒍᓐᓇᓂᖅᓴᐅᒐᔭᕋᓗᐊᖅᑎᓪᓗᒋᑦ ᐃᓄᖃᓗᐊᕐᓂᖅᓴᓄᑦ ᑲᓇᑕᒥ ᒥᐊᓕᒐᕐᓂᓗ ᐊᑐᐃᓐᓇᐅᒪᑎᑕᐅᓗᐊᓲᖑᕗᑦ ᑖᒃᑯᓄᖓ, ᓄᓇᕗᑦ ᒫᓐᓇᐅᔪᖅ ᐱᔨᑦᑎᖅᑕᐅᖔᖅᑎᓪᓗᒍ ᐱᑐᖃᐅᓂᖅᓴᓄᑦ ᖁᒻᒧᐊᑦᑎᑕᐅᔪᓕᕆᔾᔪᑎᓄᑦ ᐃᓱᓕᑦᑎᓛᓕᖅᑐᑎᑦ ᐊᑐᖅᑕᐅᔪᓐᓇᕐᓂᖏᑦ. 

ᑕᐃᒫᒃᓴᐃᓐᓇᕐᓗ, ᐅᖃᐅᑕᐅᔭᕆᐊᖃᕆᕗᖅ ᐅᖓᓯᒃᑐᓃᒻᒥᒻᒪᑕ ᐃᓚᖏᑦ ᐃᓄᐃᑦ ᖃᓪᓗᓈᓂ ᑲᓇᑕᒥᐅᒐᓗᐊᖅ, ᐊᒻᒪᓗ ᐅᖓᓯᓐᓂᖅᓴᐃᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᑦ ᑲᓇᑕᑉ ᐊᕕᑦᑐᖅᓯᒪᔪᖏᓐᓂ ᐅᑭᐅᖅᑕᖅᑐᒦᓐᓂᖅᓴᐅᔪᑦ, ᐱᔨᑦᑎᖅᑕᐅᙱᓐᓂᓴᑦᑎᐊᒻᒪᕆᐅᓲᑦ ᐊᒻᒪᓗ/ᐅᕝᕙᓘᓐᓃᑦ ᐊᑭᑐᓂᖅᓴᒻᒪᕆᐅᓪᓗᑎᑦ ᓄᓇᕗᑉ ᓴᓂᐊᓂ.

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐊᔭᐅᕆᒋᐊᖃᑦᑕᖅᓯᒪᕗᖅ ᐋᖅᑭᒋᐊᖅᑕᐅᖁᓪᓗᒋᑦ ᒪᓕᒐᕋᓛᖏᑦ ᐊᒻᒪᓗ ᑮᓇᐅᔭᓂᑦ ᐃᑲᔫᓯᐊᖅᑖᕐᓂᕐᒧᑦ ᑐᙵᕕᖏᓐᓂᑦ ᑐᓴᐅᒪᖃᑎᒌᔾᔪᑎᓕᕆᔾᔪᑎᓄᑦ ᐱᔨᑦᑎᕋᕈᑎᓄᑦ ᐅᑭᐅᖅᑕᖅᑐᒥ ᐃᓕᓴᕆᔭᐅᖁᓪᓗᒍ ᓄᑭᓪᓚᐅᑏᑦ ᐃᑭᐊᖅᑭᔾᔪᑏᑦ ᐱᔨᑦᑎᕋᕈᑕᐅᓗᑎᑦ ᐱᑕᖃᕆᐊᖃᓪᓚᕆᒻᒪᑕ ᐊᒻᒪᓗ ᐃᑲᔪᖅᑕᐅᖁᓪᓗᒋᑦ ᐊᑐᐃᓐᓇᐅᒪᖃᑦᑕᕐᓂᐊᕐᒪᑕ ᐊᒻᒪᓗ ᐊᑭᑐᓗᐊᖃᑦᑕᕐᓂᐊᙱᒻᒪᑕ ᐃᑭᐊᖅᑭᔪᓐᓇᐅᑏᑦ ᑕᒪᐃᓐᓂ ᓄᓇᕗᑉ ᓄᓇᓕᖏᓐᓂ, ᐊᒻᒪᓗᑦᑕᐅᖅ ᐅᖄᓚᐅᑎᓕᕆᔾᔪᑎᖏᑦ ᐱᖃᓯᐅᑎᒻᒥᓗᒋᑦ.

ᖃᕋᓴᐅᔭᓕᕆᔾᔪᑏᑦ ᑲᓱᖅᑎᑦᑎᔪᑦ ᓄᓇᓕᓐᓂ ᐱᔨᑦᑎᕋᖅᑎᑦᑎᔨᐅᔪᑦ (ᓄᓇᔅᓯᖕᓂᑦ) ᑕᐃᔭᐅᕗᖅ “ᑭᖑᓪᓕᖅᐹᖓᓂ ᑲᓱᙱᓱᖓᕐᓂᖓ” ᖃᕋᓴᐅᔭᓕᕆᔾᔪᑏᑦ.  ᓄᓇᕗᒥ ᐊᒥᓲᒻᒪᑕ ᑕᐃᒪᐃᑦᑐᑦ ᐱᖃᓯᐅᑎᓪᓗᒋᑦ ᐅᐊᔭᖃᙱᑦᑐᑦ ᐊᒻᒪᓗ ᐃᑭᐊᖅᑭᔾᔪᑏᑦ ᓄᑭᓪᓚᐅᑎᖏᑦ ᓯᓕᓐᓂᖅᓴᑦ.  ᑭᖑᓪᓕᕐᒥ ᑲᓱᕋᓱᐊᕐᓗᓂ ᖃᕋᓴᐅᔭᖅᑎᒍᑦ ᑲᓱᖅᑎᓪᓗᒍ ᓄᓇᓕᓐᓂ ᐱᔨᑦᑎᕋᕈᑎᖓ ᐃᑭᐊᖅᑭᔾᔪᑎᒧᑦ (ᓄᓇᕐᔪᐊᓕᒫᒧᑦ).  ᑖᓐᓇ ᑕᐃᔭᐅᔪᖅ ᑲᓱᖅᑕᕈᑎᖓ ᐊᑐᖅᑕᐅᓂᐊᓕᖅᑎᓪᓗᒍ ᐃᑭᐊᖅᑭᔾᔪᑎ ᐊᒻᒪᓗ ᓄᓇᕗᒥ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᑭᓯᐊᓂ ᐊᑐᐃᓐᓇᐅᒻᒪᑦ.  ᑭᖑᓪᓕᕐᒥ ᖁᒻᒧᐊᑦᑎᑕᐅᓯᒪᔪᖅᑎᒍ ᐊᑐᖅᑕᐅᖃᑦᑕᓛᖅᑐᑦ ᐃᔾᔪᓂᖅᓴᐅᒐᓗᐊᖅᑎᓪᓗᒋᑦ ᑲᓇᑕᒥ ᒥᐊᓕᒐᕐᓂᓗ ᐊᑐᖃᑦᑕᖅᑐᓄᑦ ᐊᑐᐃᓐᓇᐅᒪᑎᑕᐅᒐᔭᖅᑐᑦ ᐃᓄᐊᒋᐊᓐᓂᖅᓴᐅᓃᑦᑐᓄᑦ, ᓄᓇᕗᑦ ᐅᓪᓗᒥᐅᔪᖅ ᐱᑐᖃᐅᓂᖅᓴᒧᑦ ᐱᔨᑦᑎᖅᑕᐅᒻᒪᑦ ᖁᒻᒧᐊᑦᑎᑕᐅᓯᒪᔪᖅᑎᒎᖓᔪᑦ ᐃᓱᓕᑦᑎᓕᖅᑐᑎᓪᓗ ᐊᑐᕋᒃᓴᐅᓂᖏᑦ.

ᐊᓯᖏᓐᓂᒃ ᑲᓱᖅᑕᕈᑎᓂᑦ ᐊᑐᕋᒃᓴᖅᑕᖃᖅᑐᖅ ᐊᒻᒪᓗ 2011-ᒥ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐱᒋᐊᖅᑎᑦᑎᖁᔨᓚᐅᖅᓯᒪᕗᖅ ᓄᑭᓪᓚᐅᑏᑦ ᓱᑲᓐᓂᖅᓴᑦ ᐊᑐᕋᒃᓴᐅᒻᒪᖔᑕ ᖃᐅᔨᓴᖁᔨᓪᓗᓂ ᓈᒻᒪᑦᑐᒥᒃ ᐅᓪᓗᒥᐅᔪᕐᓗ ᑐᑭᓯᒋᐊᕈᑎᓂᑦ ᐊᑐᕐᓗᓂ ᐱᑕᖃᖃᑦᑕᕐᓂᐊᕐᒪᑦ ᖃᐅᔨᓴᖅᑕᐅᖁᔨᓪᓗᓂ ᐅᑯᓂᖓ ᐊᑭᖏᓐᓂᑦ, ᐊᒃᓱᕈᕈᑕᐅᒐᔭᖅᑐᓂᑦ ᐊᒻᒪᓗ ᐃᑲᔫᑎᒋᔭᐅᒐᔭᖅᑐᓂᑦ ᐱᐅᓂᖅᓴᓂᑦ ᐃᑭᐊᖅᑭᔪᓐᓇᐅᑎᑕᖃᕐᓂᕈᓂ ᑲᓱᖅᑕᕈᑎᓂᑦ ᓄᑖᖑᓂᖅᓴᓂᑦ ᐊᑐᕐᓗᓂ, ᐱᓗᐊᖅᑐᒥᒃ ᓄᑭᓪᓚᐅᑎ ᐃᔾᔪᑎᓂᖅᓴᑦ, ᓄᑭᓪᓚᐅᑎᖃᕆᐊᖃᙱᑦᑐᒃᑯᑦ ᓄᑖᖑᓂᖅᓴᓂᓪᓗ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐊᑐᕋᒃᓴᓂᑦ ᐊᑐᖔᕐᓂᕈᑎᑦ.

ᓄᓇᕗᑦ ᐃᓕᑉᐹᓪᓕᕈᓐᓇᓪᓚᕆᒻᒪᑦ ᕿᒥᕐᕈᒍᑎᑦ ᑲᓇᓐᓇᕐᒥᐅᓂᑦ.  ᑲᓛᖡᑦ ᓄᓈᓐᓂ ᓄᓇᒃᑯᑦ ᑲᓱᕈᓐᓇᙱᓚᓪᓗ ᐊᖅᑯᑎᖃᙱᓐᓂᑯᖏᓐᓄᑦ ᓄᓇᓕᖏᑦ ᑭᓯᐊᓂᓕ ᑐᓴᐅᒪᖃᑎᒌᔾᔪᑎᖏᑦ ᐊᔾᔨᒌᙱᑦᑐᕈᓘᔮᓗᓐᓂᒃ ᐱᔨᑦᑎᖅᑕᐅᔪᑦ ᑕᒪᐃᓐᓄᑦ ᓄᓇᓕᖏᓐᓄᑦ ᐊᔾᔨᒌᙱᑐᒡᒍᑎᑎᒍᑦ ᓲᕐᓗ ᓄᑭᓪᓚᐅᑎᑎᒍᑦ, ᐅᐊᔭᖃᙱᑐᒃᑯᑦ ᐊᒻᒪᓗ ᖁᒻᒧᐊᑦᑎᑕᐅᓯᒪᔪᒃᑯᑦ ᑲᓱᖅᑕᕈᑎᖏᑦ ᐊᑐᖅᑕᐅᓂᐊᓕᖅᑎᓪᓗᒋᑦ ᖃᕋᓴᐅᔭᓕᕆᔾᔪᑎᖏᑦ.  ᐆᑦᑑᑎᒋᓗᒍ, ᑕᒪᐃᓐᓂᑦ ᓄᓇᓕᖏᑦ ᐃᔨᑦᑎᖅᑕᐅᕗᑦ ᓄᑭᓪᓚᐅᑎᑎᒍᑦ ᐃᔾᔪᓂᖅᓴᒃᑯᑦ, ᖃᓄᐃᑦᑑᒐᓗᐊᕈᓂ ᑲᓱᖅᑕᕈᑎᖏᑦ.  ᑕᒪᐃᓐᓂᑦ ᓄᓇᓕᖏᑦ 70−ᐅᔪᑦ ᐅᖓᑖᓄᓪᓘᓐᓃᑦ ᐃᓄᓖᑦ 2G−ᑎᒍᑦ ᐅᖄᓚᐅᑎᕋᓛᒃᑯᑦ ᓱᑲᓐᓂᖅᓴᐅᓪᓗᑎᑦ ᐱᔪᓐᓇᖅᑐᑦ ᐊᒻᒪᓗ 3G ᓱᑲᓐᓂᖓ ᐊᑐᕐᓗᒍ ᐱᔨᑦᑎᖅᑕᐅᕗᑦ ᓄᓇᓕᐸᐅᔭᓕᒫᖏᓐᓄᑦ, ᐃᓚᖏᑦ ᓄᓇᓕᖏᓐᓄᑦ ᐊᒻᒪᓗ ᐃᓚᖏᑦ ᐱᙳᐊᕐᕕᖏᓐᓄᑦ ᓄᓇᒃᑰᕈᑎᖃᕐᕕᖏᓪᓗ. 

ᓰᐱᓕᕆᔩᑦ ᐊᒻᒪᓗ ᑐᒃᑐᓂᑦ ᐱᕈᖅᓴᐃᔩᑦ ᓄᓇᓖᑦ ᓯᓚᑖᓃᑦᑑᒐᓗᐊᑦ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐃᑭᐊᖅᑭᔾᔪᑎᓖᑦ − ᐊᑭᖏᑦ ᐊᔾᔨᒌᑦᑐᒡᒍᑕᐅᓪᓗᑎᑦ ᓄᑭᓪᓚᐅᑎᒃᑯᑦ ᐃᑭᐊᖅᑭᔾᔪᑎᓕᕆᔾᔪᑦ ᐃᔾᔪᑎᓂᖅᓴᑦ ᐊᑐᕐᓗᒋᑦ ᐊᑭᖏᑦ.

ᐅᖃᑐᐃᓐᓇᕐᓗᒍ: ᖃᕋᓴᐅᔭᓕᕆᔾᔪᑏᑦ ᖃᓄᐃᑦᑑᔭᕆᐊᖃᙱᑦᑐᑦ, ᐃᓄᓐᓄᑦ ᑭᒃᑯᑐᐃᓐᓇᕐᓄᑦ ᐊᑐᐊᒐᓕᐊᕆᔭᐅᓱᑦ ᐊᓯᔾᔨᕈᑎᑦ ᐱᐅᓂᖅᓴᕈᕈᓐᓇᖅᑐᑦ.  ᓂᕈᐊᖅᑕᐅᓯᒪᔪᑦ ᐱᔪᒪᓂᖃᕆᐊᓖᑦ ᓈᒻᒪᑦᑐᑎᒍᓪᓗ ᑮᓇᐅᔭᓂᒃ ᐃᑲᔫᓯᐊᖅᑖᕐᓗᑕ ᖃᐅᔨᒪᓇᑦᑎᐊᖁᓪᓗᒍ ᑕᒪᐃᓐᓂ ᓄᓇᕗᒥᐅᑦ ᓈᒻᒪᑦᑐᒃᑯᑦ, ᐊᑭᑐᓗᐊᙱᑐᒃᑯᑦ ᓇᓕᒧᒌᑦᑐᒃᑯᓪᓗ ᑐᓴᐅᒪᖃᑎᒌᔪᓐᓇᕈᑎᖏᑦ ᐱᔨᑦᑎᖅᑕᐅᔪᓐᓇᖁᓪᓗᒋᑦ ᑲᓱᖅᑕᕈᑎᖏᑦ ᐃᑭᐊᖅᑭᔾᔪᑎᓕᕆᔾᔪᑦ ᖃᓄᐃᑦᑑᒐᓗᐊᖅᐸᑕ.

ᐱᓕᕆᐊᖃᕐᓂᐊᕐᓂᕋᕐᓂᖅ ᖃᐅᔨᒪᓇᑦᑎᐊᖁᓪᓗᒍ ᑕᒪᐃᓐᓂᑦ ᑲᓇᑕᒥᐅᑦ ᐊᑭᑐᓗᐊᙱᑦᑐᑎᒍᑦ ᑐᓴᐅᒪᖃᑦᑕᐅᑎᔾᔪᑎᓄᑦ ᐱᔨᑦᑎᕋᖅᑕᐅᔭᕆᐊᖃᕐᓂᖏᑦ ᑎᑎᕋᖅᓯᒪᔪᑦ ᑐᓴᐅᒪᖃᑦᑕᐅᑎᔪᓕᕿᓂᕐᒧᑦ ᐱᖁᔭᖅ.  ᐃᓚᖓ 7−ᒥ ᐱᖁᔭᕐᓂᑦ ᐅᖃᖅᓯᒪᔪᑦ ᐱᓇᓱᐊᖅᑕᖏᑦ ᑲᓇᑕᒥ ᑐᓴᐅᒪᖃᑦᑕᐅᑎᓕᕆᔾᔪᑎᑦ ᐊᑐᐊᒐᖓᓂ, ᐱᖃᓯᐅᑎᓪᓗᒍ ᐱᓇᓱᐊᖅᑕᐅᔭᕆᐊᓕᒃ “ᑕᑎᒋᔭᒃᓴᒥᒃ ᐊᑭᑐᓗᐊᙱᑦᑐᒥᑦ ᑐᓴᐅᒪᖃᑦᑕᐅᑎᔾᔪᑎᖃᕆᐊᓖᑦ ᐱᔨᑦᑎᖅᑕᐅᓗᑎᑦ ᐱᐅᓛᒃᑯᑎᒍᑦ ᑲᓇᑕᒥᐅᑦ ᐊᑐᕈᓐᓇᕋᔭᖅᑕᒥᓂᑦ ᓄᓇᓕᐸᐅᔭᕐᒦᒃᑲᓗᐊᕈᑎᓪᓘᓐᓃᑦ ᐅᖓᓯᒃᑐᒦᒃᑲᓗᐊᕈᑎᓪᓘᓐᓃᑦ ᑕᒪᐃᓐᓂᑦ ᑲᓇᑕᑉ ᐊᕕᑦᑐᖅᓯᒪᔪᖏᓐᓂ”.

ᐅᓪᓗᒥᐅᔪᖅ, ᖃᓪᓗᓈᓂ ᐅᖄᓚᐅᑎᓕᕆᔨᖏᑦ (ᐊᒻᒪᓗ ᐃᓚᖓᒍᑦ, ᐅᖄᓚᐅᑎᑖᖅᐸᑦᑐᑦ) ᐊᑭᓖᓲᖑᕗᑦ ᖃᑦᑏᓐᓇᐅᒐᓗᐊᕐᓂᑦ ᑖᒃᓯᔅᓂᑦ (1−ᐳᓴᓐᑎᐅᙱᒻᒪᕆᑦᑐᑦ ᑮᓇᐅᔭᑦ ᐃᓯᖅᐸᓪᓕᐊᔪᓅᖅᐸᑦᑐᑦ) ᑖᒃᑯᓄᙵᖅᑕᑐᑎᑦ ᑲᓇᑕᒥ ᐃᑲᔫᓯᐊᖅᑖᕆᔭᐅᓂᐊᖅᑐᓄᑦ ᑮᓇᐅᔭᑦ ᐃᑲᔪᖅᑐᐃᔪᑦ ᐊᑐᐃᓐᓇᐅᒪᑎᑕᐅᕙᓐᓂᖏᑦ ᐊᑦᑎᓛᕆᔪᓐᓇᖅᑕᖏᑦ ᐱᔨᑦᑎᖅᑕᐅᖁᔭᐅᔪᑦ ᐱᔨᑦᑎᕋᐅᑎᑦ ᐅᖓᓯᒃᑐᓄᑦ ᓄᓇᓕᕋᓛᓃᓐᓂᖅᓴᓄᓪᓗ.  ᑖᒃᑯᐊ ᐊᑦᑎᓛᕆᔪᓐᓇᖅᑕᖏᑦ ᐱᔨᑦᑎᖅᑕᐅᖁᔭᐅᔪᑦ ᐱᔨᑦᑎᖅᑕᐅᔪᓐᓇᖁᓪᓗᒋᑦ ᐃᓄᐃᑦ ᓇᓗᓇᐃᖅᑕᐅᓚᐅᖅᓯᒪᕗᑦ ᐅᐊᑦᑎᐊᕈᒻᒪᕆᐊᓗᒃ ᐊᒻᒪᓗ ᐅᓪᓗᒥᐅᔪᖅ ᐊᑐᖅᑕᐅᖔᖅᑐᑦ ᐅᐊᔭᓅᖅᑐᓄᑦ ᐅᖄᓚᐅᑎᓄᑦ ᐊᒻᒪᓗ ᐅᖄᓚᐅᑎᒃᑯᑎᒍᑦ ᐃᑭᐊᖅᑭᔾᔪᑎᓕᕆᔾᔪᑎᓄᑦ.  ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐊᐃᕙᐅᑎᓇᓱᖃᑦᑕᕐᓂᑰᕗᑦ, ᐊᓯᖏᓪᓗ ᑕᐃᒪᐃᒻᒥᒻᒪᑕ, ᐅᓪᓗᒥᐅᔪᖅ ᑐᑭᖓ ᐱᑐᖃᐅᓗᐊᓕᕐᒪᑦ ᐊᒻᒪᓗ ᐃᓕᓴᖅᓯᔭᕆᐊᓕᒃ ᓄᑭᓪᓚᐅᑏᑦ ᐃᑭᐊᖅᑭᔾᔪᑎᓕᕆᔾᔪᑏᑦ ᐱᔨᑦᑎᕋᕈᑎᒋᔭᐅᖃᑦᑕᓪᓚᕆᒋᐊᖃᕐᒪᑕ ᐊᑐᖅᑕᐅᖃᑦᑕᕆᐊᖃᓪᓚᕆᒃᑐᑎᑦ ᐃᓄᓕᒪᓄᑦ.

ᐱᕙᓪᓕᐊᔪᓕᕆᓂᕐᒧᑦ ᐱᓪᓗᒍ ᐊᐃᕙᐅᑎᒋᔾᔪᑎᒋᔭᖏᓐᓄᑦ ᑐᙵᕕᖃᕋᓱᐊᕐᓂᖏᑦ

ᐊᒥᓱᑦ ᖃᐅᔨᓵᖑᓯᒪᓕᖅᑐᑦ ᓲᕐᓗ ᓄᓇᕐᔪᐊᕐᒥ ᓈᓚᐅᑎᒃᑰᕈᓐᓇᐅᑎ, ᑲᑐᔾᔨᖃᑎᒌᑦ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᖃᑎᒌᑦᑐᑦ ᐱᕙᓪᓕᐊᑎᑦᑎᔩᓪᓗ, ᓄᓇᕐᔪᐊᕐᒥ ᑐᓴᐅᒪᖃᑎᒌᑦᑐᓕᕆᔨᒃᑯᑦ ᔫᓂᐊᓐᖏᑦ, ᓯᓚᑦᑐᓴᕐᕕᕐᔪᐊᕐᒥ ᐱᓕᕆᔪᑦ ᐊᒻᒪᓗ ᐊᓯᖏᑦ ᒐᕙᒪᒃᑯᑦ, ᑕᑯᒃᓴᐅᑎᑦᑎᕗᑦ ᖃᐅᔨᓵᒥᓂᖏᑦ ᐱᐅᔪᒃᑐᑦ ᓴᖅᑮᓲᖑᓂᖏᓐᓂᑦ ᐃᑭᐊᖅᑭᔾᔪᑎᓕᕆᔾᔪᑏᑦ ᐊᒻᒪᓗ ᑮᓇᐅᔭᓕᐅᕈᑎᖃᕈᓐᓇᕐᓂᖏᑦ.  ᑮᓇᐅᔭᖅᑎᒍᑦ ᐃᑲᔪᖅᑐᖅᑕᐅᖃᑦᑕᐃᓐᓇᙱᒃᑯᑎᑦ ᖃᑦᑏᓐᓇᐅᖃᑦᑕᕈᑎᑦ ᐅᑭᐅᖅᑕᖅᑐᒥ ᐃᑭᐊᖅᑭᔾᔪᑎᐅᔪᑦ, ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔾᔪᑎᖃᕈᓐᓇᕐᓂᖏᑦ ᐊᔾᔨᒌᙱᒋᐊᓪᓚᒃᑲᔭᖅᑐᑦ ᐊᒻᒪᓗ ᑮᓇᐅᔭᓕᐅᕈᑎᖃᕈᓐᓇᖃᑦᑕᕋᔭᙱᑦᑐᑦ ᓄᓇᕗᒧᑦ ᐊᒻᒪᓗ ᓄᓇᕗᒥᐅᑕᕐᓄᑦ.

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓᑕ ᓇᒻᒥᓂᑉ ᐃᑭᐊᖅᑭᔾᔪᑎᓕᕆᓂᕐᒧᑦ ᐃᓅᓯᖃᑦᑎᐊᕐᓂᕐᒧᑦᐱᕙᓪᓕᐊᓂᕐᒧᓪᓗ ᐊᑦᑐᐃᓂᖃᕐᓂᖓᑕ ᖃᐅᔨᓴᐅᑎᖓ ᒪᓕᑦᑐᒍ ᖃᐅᔨᓯᒪᓕᖅᐳᑦ ᓄᓇᕗᑦ ᐱᔪᓐᓇᕐᓂᕈᑎᑦ ᓇᓕᒧᒌᓕᕐᓗᑎᑦ ᓱᑲᓐᓂᖅᓴᐅᔪᒥᑦ ᐃᑭᐊᖅᑭᔾᔪᑎᖃᕈᑎᑦ (ᐅᖃᐅᓯᕆᑦᑎᐊᖔᕐᓗᒍ, ᓄᑭᓪᓚᐅᑎᖏᑦ ᐱᐅᓯᓂᖅᓴᐅᒍᑎᑦ) ᐅᖓᓯᑦᑐᒥᐅᑕᕐᓄᑦ ᑲᓇᑕᒥ ᖃᓪᓗᓈᓂ ᐊᑐᐃᓐᓇᐅᒪᑎᑕᐅᕙᑦᑐᓄᑦ, ᐅᓪᓗᒥᐅᔪᖅ ᐊᑦᑐᐃᓂᖃᕐᓂᖏᑦ ᐃᑭᐊᖅᑭᔾᔪᑏᑦ ᐊᑐᖅᑕᐅᔪᓐᓇᖅᑐᑦ ᐱᕈᖅᐸᓪᓕᐊᒍᓐᓇᕋᔭᖅᑐᑦ ᒪᕐᕈᐊᖅᑎᒃᑲᓐᓂᒻᒪᕆᒃ ᐅᕝᕙᓘᓐᓃᑦ 3.2−ᒃᑲᓐᓂᒻᒪᕆᒃ ᐅᓪᓗᒥᐅᔪᖅ ᐱᔪᓐᓇᕐᓂᖏᑦ ᖄᖓᒍᒃᑲᓐᓂᒻᒪᕆᒃ, ᐃᒪᓐᓇᐸᓗᒃ $30 ᐊᒻᒪᓗ $50 ᒥᓕᐊᓐ ᐊᕐᕌᒍᑕᒫᑦ ᑮᓇᐅᔭᓕᐅᕈᓐᓇᕐᓂᖏᑦ (ᓂᐅᕕᐊᕆᔭᐅᕙᒃᑐᑦ ᐊᑭᑐᓂᖏᑦ ᒪᓕᓪᓗᒋᑦ), $20 ᐊᒻᒪᓗ $30 ᒥᓕᐊᓐ ᑮᓇᐅᔾᔭᒃᓴᒍᑕᐅᒍᓐᓇᓕᕐᓗᑎᑦ ᑮᓇᐅᔾᔭᒃᓵᕆᔭᐅᓗᑎᓪᓗ (ᐃᒡᓗᒥᐅᖃᑎᒌᑦ ᑮᓇᐅᔾᔭᒃᓵᖏᑦ), 390 ᐊᒻᒪᓗ 630 ᐃᖅᑲᓇᐃᔮᑦ ᓴᖅᑭᕐᓗᑎᑦ, ᐊᒻᒪᓗ $3 ᐊᒻᒪᓗ $5 ᒥᓕᐊᓐ ᑖᒃᓯᑎᒍᑦ ᑮᓇᐅᔭᑦ ᐃᓯᖅᐸᓪᓕᐊᒍᓐᓇᓕᕐᓗᑎᑦ.

ᐃᓄᐃᑦ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᑦ ᑐᙵᕕᒋᓪᓗᒋᑦ ᐊᐃᕙᐅᑎᒋᔾᔪᑎᕗᑦ

ᕗᕌᓐᒃ ᓚ ᕈ, ᓄᓇᕐᔪᐊᕐᒥ ᑲᑐᔾᔨᖃᑎᒌᖏᑦ ‘ᖃᐅᔨᓴᖅᑎᒋᔭᐅᔪᖅ ᐱᕙᓪᓕᐊᖁᓪᓗᒋᑦ ᐊᒻᒪᓗ ᓴᐳᔾᔭᐅᖁᓪᓗᒋᑦ ᐱᔪᓐᓇᐅᑎᖏᑦ ᐃᓱᒪᖅᓱᕈᓐᓇᕐᓂᖏᓐᓄᑦ ᐃᓱᒪᒋᔭᒥᓂᑦ ᐅᖃᐅᓯᖃᕐᓗᑎᑦ ᐊᒻᒪᓗ ᐅᖃᕈᓐᓇᕐᓗᑎᑦ ᖃᓄᐃᑦᑐᑐᐃᓐᓇᕐᓂᑦ, ᐅᖃᐅᓯᕆᑦᑎᐊᑕᒻᒪᕆᐊᓗᒋᓯᒪᕚ ᑕᒪᓐᓇ:

ᐃᑭᐊᖅᑭᔾᔪᑎ ᖁᔭᓈᕋᒃᓴᐅᒍᓐᓃᖅᑎᓪᓗᒍ ᐊᑐᖅᑕᐅᓲᖅ ᐃᓕᓴᕆᔭᐅᓗᑎᑦ ᐊᔾᔨᒌᙱᑦᑐᑦ ᐃᓄᐃᑦ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᑎᒍᑦ, ᓇᓕᒧᒌᙱᑎᑦᑎᔾᔪᑏᑦ ᑭᓱᑐᐃᓐᓇᐃᑦ ᐲᔭᖅᑕᐅᒍᓐᓇᖅᑐᑎᑦ, ᐊᒻᒪᓗ ᓱᑲᓐᓂᖅᓴᒃᑯᑦ ᓯᕗᒧᐊᒃᑎᒃᑲᓐᓂᒻᒪᕆᒃᑐᒍ ᐱᕙᓪᓕᐊᓂᖅ ᐊᒻᒪᓗ ᐃᓄᐃᑦ ᑭᒃᑯᑐᐃᓐᓇᐃᑦ ᐱᕙᓪᓕᐊᒍᓐᓇᕐᓂᖏᑦ, ᖃᐅᔨᒪᑦᑎᐊᕆᐊᓖᑦ ᑭᒃᑯᓕᒫᑦ ᐃᑭᐊᖅᑭᔾᔪᑎᒥᒃ ᐊᑐᕈᓐᓇᕋᓗᐊᕐᒪᖔᑕ ᓯᕗᓪᓕᐅᔾᔭᐅᓗᓂ ᑕᒪᐃᓐᓄᑦ ᒐᕙᒪᐅᔪᓄᑦ.  ᐊᑐᓂᑦ ᒐᕙᒪᐅᔪᑦ ᐋᖅᑭᒃᓱᐃᔭᕆᐊᓕᒃ ᐱᓪᓚᒃᑖᒥᒃ ᐊᒻᒪᓗ ᐊᐅᓚᓂᖃᑦᑎᐊᕈᓐᓇᖅᑐᒥᒃ ᐊᑐᐊᒐᕐᒥᒃ, ᖃᐅᔨᒋᐊᕐᕕᖃᖅᑳᓚᐅᕐᓗᑎᑦ ᐃᓄᓐᓂᑦ ᐊᑐᓂᑦ ᑕᒪᐃᓐᓂᓕᒫᖅ ᐃᓅᖃᑎᒌᑦᑐᓂᑦ, ᐱᖃᓯᐅᑎᓗᒋᓪᓗ ᓇᒻᒥᓂᖁᑎᖃᖅᑐᑦ ᐊᒻᒪᓗ ᒐᕙᒪᒃᑯᑦ ᐱᓕᕆᕝᕕᖏᑦ, ᐃᑭᐊᖅᑭᔾᔪᑎ ᐊᑐᐃᓐᓇᐅᒪᓕᖁᓪᓗᒍ, ᐊᑐᕋᒃᓴᐅᓴᕋᐃᒍᓐᓇᖁᓪᓗᒍ ᐊᑭᑐᓗᐊᙱᑦᑎᓪᓗᒍᓗ ᑕᒪᐃᓐᓄᑦ ᐃᓄᓐᓄᑦ ᖃᓄᐃᑦᑑᒐᓗᐊᖅᐸᑕ.

ᓄᓇᖁᑎᒋᔭᐅᔪᑦ ᒐᕙᒪᐅᔪᓄᑦ ᑐᙵᕕᒋᓪᓗᒍ ᐊᐃᕙᐅᑎᒋᔾᔪᑕᐅᔪᖅ

ᑕᐃᒫᒃᓴᐃᓐᓇᖅ ᓄᓇᒃᑰᕈᑎᑯᑖᖅ ᐊᖅᑯᑎᓕᐅᖅᑕᐅᓚᐅᖅᓯᒪᒻᒪᑦ ᐅᐊᑦᑎᐊᕈᐊᓗᒃ ᐊᒻᒪᓗ ᑲᓇᑕᒥ ᖃᓪᓗᓈᓂ ᐊᖅᑯᑎᓕᐅᖅᓯᒪᔪᖃᕐᓂᖓᓄᑦ ᒫᓐᓇᒫᖑᓂᖅᓴᐅᓪᓗᓂ ᐱᖁᑎᕐᔪᐊᕆᔭᐅᔭᕆᐊᖃᓚᐅᖅᑐᑦ ᑲᓱᖁᓪᓗᒋᑦ ᑲᓇᑕᓕᒫᖑᔪᖅ ᓯᔾᔭᒥ ᓯᔾᔭᒧᑦ, ᐅᓪᓗᒥᐅᓂᖅᓴᐅᓕᖅᑐᖅ ᑲᓇᑕ ᑮᓇᐅᔭᖅᑎᒍᑦ ᐊᑐᕆᐊᖃᓕᖅᑐᑦ ᑮᓇᐅᔭᓂᑦ ᑐᑭᓯᒋᐊᕈᑎᑖᕈᓐᓇᓂᕐᒧᑦ ᐊᖅᑯᑎᒋᔭᐅᔪᒥᑦ ᑲᓱᖅᑎᑦᑎᐊᖁᓪᓗᒋᑦ ᑲᓇᑕᓕᒫᖅ ᓯᔾᔭᒥ, ᓯᔾᔭᒧᑦ, ᓯᔾᔭᒃᑲᓐᓂᖓᓄᓪᓗ ᑲᓇᑕᑉ.

ᑲᓇᑕᑉ ᐅᑭᐅᖅᑕᖅᑐᖓ ᓇᔪᖅᑕᐅᓂᖓᓄᑦ ᐱᖁᑎᒋᔭᐅᓂᖓᓄᓪᓗ ᑐᙵᕕᒋᔭᖅ ᐊᐃᕙᐅᑎᒋᔾᔪᑕᐅᓪᓗᓂ

ᐅᑭᐅᖅᑕᖅᑐᖅ ᐱᕙᓪᓕᐊᒍᑎᒋᔭᐅᔪᒪᒻᒪᕆᓕᖅᑎᓪᓗᒍ, ᓄᓇᒥᐅᑕᖁᑎᖏᑦ ᐃᒪᖏᑦ (ᑲᓇᑕᒥ ᐊᓯᖏᓐᓄᑦ ᓄᓇᕐᔪᐊᒦᑦᑐᓄᑦ), ᑲᓇᑕᒧᑦ ᐃᑲᔫᑎᖃᕋᔭᖅᑐᖅ ᐃᑲᔪᖅᑐᐃᓗᑎᑦ ᖃᓄᐃᙱᑦᑐᓂᑦ ᓴᙱᔪᓂᑦ ᓄᓇᓕᖃᖅᐸᑕ ᐅᑭᐅᖅᑕᖅᑐᒥ ᐊᒻᒪᓗ ᐊᑭᑐᓗᐊᙱᓪᓗᓂ ᓇᓕᒧᒌᑦᑐᒃᑯᓪᓗ ᓄᑭᓪᓚᐅᑎᑕᖃᕆᐊᖃᖅᐳᖅ ᑕᐃᒪᐃᒍᓐᓇᖁᓪᓗᒍ.

ᐃᑭᐊᖅᑭᔪᓐᓇᐅᑏᑦ ᓄᑭᓪᓚᐅᑏᑦ ᐊᑐᐃᓐᓇᐅᒪᔪᒃᓴᐅᕗᑦ ᐱᖁᑎᕐᔪᐊᖑᓗᑎᑦ ᐋᖅᑭᒃᑕᐅᓯᒪᓗᑎᑦ ᑲᓇᑕᑉ ᐅᑭᐅᖅᑕᖅᑐᖓ ᓇᒻᒥᓂᕆᔭᐅᓂᖓᓄᑦ ᑲᓇᑕᒧᑦ.  ᓈᒻᒪᑦᑐᒃᑯᑦ ᑐᓴᐅᒪᖃᑎᒌᒍᑎᖃᙱᒃᑯᑎᑦ ᐅᑭᐅᖅᑕᖅᑐᒥ ᑐᐊᕕᕐᓇᖅᑐᑦ ᐱᔨᑦᑎᕋᕈᑎᖏᑦ, ᐋᓐᓂᐊᖅᑕᐃᓕᓂᕐᒧᑦ ᐃᓕᓐᓂᐊᕐᓂᕐᒧᓪᓗ ᐊᑐᐃᓐᓇᐅᒪᑎᑕᐅᓂᖏᑦ, ᒐᕙᒪᒃᑯᑦ ᐃᖏᕐᕋᓂᖏᑦ, ᐅᑭᐅᖅᑕᖅᑐᒥ ᖃᖓᑕᓲᖅᑐᓕᕆᔨᖏᑦ, ᓇᒻᒥᓂᖃᖅᑐᑦ ᐱᓕᕆᖃᑦᑕᕐᓂᖏᑦ, ᑮᓇᐅᔭᒃᑯᕕᓕᕆᓂᖅ ᐊᒻᒪᓗ ᐊᓯᖏᑦ ᑮᓇᐅᔭᓕᕆᔾᔪᑏᑦ, ᐊᒻᒪᓗ ᐅᓇᑕᖅᑐᑦ ᐱᓕᒻᒪᓴᕐᓂᖏᑦ ᐊᑦᑕᓇᖅᒨᕈᓐᓇᕐᒪᑕ.  ᓈᒻᒪᑦᑐᒥᒃ ᑐᓴᐅᒪᖃᑎᒌᓐᓂᕐᒧᑦ ᐱᔨᑦᑎᕋᕈᑎᑕᖃᙱᒃᑯᓂ, ᓯᕗᓂᒃᓴᖓ ᐅᑭᐅᖅᑕᖅᑐᒥ ᓄᓇᓕᐅᔪᑉ ᐊᑦᑕᓇᖅᑐᒨᕈᓐᓇᕐᒪᑦ.

ᑕᒪᐃᓐᓂᑦ ᓄᓇᕗᒥᐅᑕᐅᔪᑦ ᐊᔾᔨᒌᑦᑐᒥᑦ ᓇᓕᒧᒌᑦᑐᒥᓪᓗ ᑐᓴᐅᒪᖃᑦᑕᐅᔪᓐᓇᐅᑎᓂᑦ ᐱᔨᑦᑎᖅᑕᐅᔭᕆᐊᓖᑦ ᐊᒻᒪᓗ ᓇᓕᐊᑐᐃᓐᓇᖅ ᐊᑐᖅᑕᐅᓇᓱᒃᑐᖅ ᐃᓚᖏᓐᓂ ᐱᔨᑦᑎᖅᑕᐅᑎᑦᑎᓗᓂ ᐃᓚᖏᓐᓄᑦ ᓄᓇᓕᓐᓄᑦ ᓈᒻᒪᙱᒻᒪᑦ ᐃᓚᑰᓪᓗᓂ, ᓇᓕᒧᒌᑦᑎᑦᑎᙱᑦᑐᓂᓗ.  ᐃᒪᐃᑉᐸᕆᑉᐳᖅ, ᖃᓪᓗᓈᓂ ᑲᓇᑕᒥ ᐊᑐᖅᑕᐅᓲᑦ ᐊᑐᕆᐊᙵᖅᑕᐅᒍᓂ ᐅᑭᐅᖅᑕᖅᑐᒥ, ᐊᒻᒪᓗ ᐊᔾᔨᒌᙱᓐᓂᖃᖃᑦᑕᕐᓂᑰᕗᑦ ᐱᔨᑦᑎᖅᑕᐅᓂᖏᑕ ᐊᒃᓱᕈᕈᑎᖃᖃᑦᑕᖅᑐᑎᑦ ᐅᖓᓯᑦᑐᒥᐅᑕᕐᓄᑦ ᖃᑦᑏᓐᓇᐅᔪᓂᓪᓗ ᐃᓄᓕᓐᓄᑦ ᓄᓇᓕᓐᓄᑦ ᐱᒋᐊᙵᓚᐅᖅᓯᒪᒻᒪᓂᑦ ᐃᑭᐊᖅᑭᔾᔪᑎᒧᑦ ᐱᔨᑦᑎᕋᕐᓂᖏᑦ ᑲᓇᑕᒥ.

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐱᙳᓚᐅᖅᓯᒪᒻᒪᓂᑦ ᐊᔭᐅᕆᖃᑦᑕᕐᓂᑰᕗᑦ ᐱᔨᑦᑎᖅᑕᐅᔭᕆᐊᖃᕐᓂᖏᓂᑦ, ᐅᕝᕙᓘᓐᓃᑦ ᓇᓕᒧᒌᑦᑐᒃᑯᑦ ᐱᔨᑦᑎᕋᐅᑎᓂᑦ ᐊᑐᐃᓐᓇᐅᒪᕕᐅᖃᑦᑕᕆᐊᖃᕐᓂᖏᓐᓂᑦ ᓄᓇᓕᓕᒫᖑᔪᑦ ᓄᓇᕗᒥ.  ᐃᓄᖏᑕ ᐊᒥᓲᓂᖏᑦ ᓄᓇᕗᒥ ᓇᓕᒧᒌᓐᓂᖅᓴᒃᑯᑦ ᓄᓇᓕᓐᓂ ᐊᔾᔨᒌᑦᑐᒡᒍᑕᐅᓂᖅᓴᐅᒻᒪᑕ ᑲᓇᑕᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐱᖓᓱᑦ ᐊᖏᓛᑦ ᓄᓇᓖᑦ ᓄᓇᕗᑉ ᐃᓄᖏᑕ ᐊᒥᓲᓂᖏᑦ ᐊᕝᕙᖏᑕ ᐊᕝᕙᒃᑲᓐᓂᕆᕙᐃᑦ.  2011 ᑭᓪᓕᓯᓂᐊᖅᑕᐅᓯᒪᔪᑦ ᒪᓕᑦᑐᒋᑦ, ᓄᓇᓕᐅᔪᖅ ᐃᓄᖏᑦ ᓱᒃᑲᓕᓛᕐᒥᑦ ᐊᒥᓱᕈᖅᐸᓪᓕᐊᓯᒪᔪᑦ 2006-2011−ᖑᑎᓪᓗᒍ ᓇᐅᔮᖑᕗᖅ.  26.3%-ᓂᑦ ᐊᒥᓱᕈᕆᐊᖅᓯᒪᔪᑦ ᐃᓄᖏᑦ ᐊᒥᓲᓂᖏᑦ (ᐃᖃᓗᐃᑦ 8.3%−ᑐᐃᓐᓇᐅᓪᓗᑎᑦ ᐊᒥᓱᕈᖅᓯᒪᔪᑦ ᐃᓄᖏᑦ).  ᐃᒪᐃᑉᐳᖅ, 12-ᖑᔪᑦ ᓄᓇᓖᑦ ᖁᓖᑦ ᐅᖓᑖᓄᓪᓗ ᐊᒥᓱᕈᕆᐊᖅᓯᒪᔪᑦ ᐃᓄᖏᑦ 2006−ᖑᓚᐅᖅᓯᒪᒻᒪᓂᑦ− ᐊᒻᒪᓗ ᐊᕕᑦᑐᖅᓯᒪᔪᓂ ᓄᓇᓕᐸᐅᔭᖏᑦ ᐱᖃᑕᐅᓐᓂᖏᑦᑐᑦ ᐊᒥᓱᕈᓗᐊᓚᐅᖅᓯᒪᙱᓐᓂᖏᓐᓄᑦ.  ᑐᑭᓯᒐᒃᓴᕈᖅᑎᓪᓗᒍ ᐱᔭᕆᐊᑭᑦᑐᒃᑯᑦ, ᓄᓇᕗᑉ ᐃᓄᖏᑕ ᐊᒥᓲᓂᖏᑦ ᓇᓕᒧᒌᓛᖑᕗᑦ ᑕᒪᐃᓐᓂᑦ 25−ᖑᔪᓂᑦ ᓄᓇᓕᓐᓂ, ᓄᓇᕗᑉ ᐃᓄᖏᑦ ᐊᒥᓱᕈᖅᐸᓪᓕᐊᓂᖏᑕ ᓱᑲᓐᓂᖏᑦ ᐊᔾᔨᒌᑦᑐᒡᒍᑕᐅᓗᐊᖅᑐᑎᓪᓗ.  ᐊᓯᔾᔨᖅᐸᓪᓕᐊᒻᒪᑦ ᒥᑭᓂᖅᓴᐃᑦ ᓄᓇᓖᑦ ᓱᑲᓐᓂᖅᓴᒃᑯᑦ ᐊᒥᓱᕈᖅᐸᓪᓕᐊᓛᖑᓪᓗᑎᑦ ᐊᖏᓂᖅᓴᐃᑦ ᓄᓇᓖᑦ ᓱᒃᑲᓕᓗᐊᕌᓗᙱᑦᑐᒥᑦ ᐊᒥᓱᕈᖅᐸᓪᓕᐊᑎᓪᓗᒋᑦ ᐊᔾᔨᐅᙱᑦᑐᓂ ᑕᒪᓐᓇ ᓄᓇᕗᒥ.  ᐊᓯᖏᓐᓂᓪᓕ ᓯᓚᑖᓂ ᓄᓇᕗᒥ, ᒥᑭᓂᖅᓴᐃᑦ ᓄᓇᓕᖏᑦ ᖃᑦᑏᓐᓇᕈᕐᓂᖅᓴᐅᕗᑦ, ᐊᒻᒪᓗ ᓄᓇᓕᐸᐅᔭᖏᑦ ᐃᓄᖏᑦ ᐊᒥᓲᓂᖏᑦ ᐊᒥᓱᕈᖅᐸᓪᓕᐊᓂᖅᓴᐅᓪᓗᑎᑦ (ᓄᓇᕐᔪᐊᕐᒥ ᖃᐅᔨᒪᔭᐅᔪᖅ ᓄᓇᓕᕋᓛᓃᙶᖅᑐᑦ ᐃᓄᖃᕈᓐᓃᖅᐸᓪᓕᐊᓂᖏᑦ).  ᓄᓇᕗᑦ ᓇᒻᒥᓂᖅ ᐊᑐᐊᒐᖃᕆᐊᓖᑦ ᐊᒻᒪᓗ ᐊᖅᑭᒍᑎᒃᓴᖃᕐᓗᑎᑦ ᐊᔾᔨᐅᙱᑦᑐᑦ ᐊᒃᓱᕈᕈᑎᕗᑦ ᒪᓕᓪᓗᒋᑦ.

ᐱᔨᑦᑎᖅᑕᐅᓂᖏᑦ ᓇᓕᒧᒌᑦᑐᒃᑯᑦ ᐱᒻᒪᕆᐅᒋᕗᖅ ᓄᓇᕗᒥ ᓄᓇᓕᖏᑦ ᐃᑲᔫᓯᐊᖅᑖᕆᐊᖃᕐᓂᖏᓐᓄᑦ ᐱᔨᑦᑎᕋᖅᑕᐅᓂᖏᑦ ᒥᑭᓂᖅᓴᓂᑦ ᓂᐅᕕᕐᕕᐅᕙᒃᑐᓂᑦ/ᓄᓇᓕᓐᓂ ᑮᓇᐅᔭᓕᐅᕈᓐᓇᖃᑦᑕᖁᓪᓗᒋᑦ.  ᑐᑭᓕᒃ ᑕᒪᓐᓇ ᓇᒻᒥᓂᖁᑎᒋᔭᐅᔪᖅ ᐱᔨᑦᑎᕋᖅᑐᖅ ᑕᒪᐃᓐᓂᑦ 25−ᖑᔪᓂᑦ ᓄᓇᓕᓐᓂ ᑮᓇᐅᔭᓕᐅᕈᑎᒋᔭᒥᓂᕐᒥᓂᑦ ᐊᖏᓂᖅᓴᓅᖅᑎᑦᑎᒍᓐᓇᖅᑐᖅ ᓂᐅᕕᕐᕕᐅᔪᒥᓂᐅᓂᖓᓄᑦ ᐊᖏᓂᖅᓴᓂ ᓂᐅᕕᕐᕕᓕᓐᓂ/ᓄᓇᓕᓐᓂ ᐃᑲᔪᕐᓗᒋᑦ ᐊᑭᓕᖅᑕᐅᓂᖏᑦ ᐱᔨᑦᑎᕋᕐᓂᖏᓐᓄᑦ ᓄᓇᓕᓐᓂ ᓂᐅᕕᕐᕕᐅᕙᑦᑐᓄᑦ/ᓄᓇᓕᓐᓄᑦ.

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᓂᐅᕕᕐᕕᐅᕗᖅ ᑐᑭᖓ ᓂᐅᕕᖅᑎᑦᑎᔨᑉ ᒪᓕᑦᑐᒍ ᐊᒻᒪᓗ ᖃᕋᓴᐅᔭᓕᕆᔾᔪᑎᓄᑦ ᖃᓄᐃᑦᑑᒐᔭᕐᓂᖏᓐᓂᒃ ᐃᓱᒪᓕᐅᖃᑦᑕᕋᓂ.  ᐊᔭᐅᕆᖔᓲᖑᕗᒍᑦ ᓇᓕᒧᒌᑦᑐᒥᒃ, ᐊᑭᑐᓗᐊᙱᑦᑐᒥᒃ ᐊᒻᒪᓗ ᓈᒻᒪᑦᑐᒥᒃ ᐃᑭᐊᖅᑭᔪᓐᓇᐅᑎᖃᖁᔨᓪᓗᑕ ᑕᑎᒋᔭᒃᓴᓂᑦ ᑐᓴᐅᒪᖃᑦᑕᐅᑎᓕᕆᔾᔪᑎᓄᑦ ᐱᔨᑦᑎᕋᕈᑎᓂᑦ ᑕᒪᐃᓐᓄᑦ ᓄᓇᕗᑉ ᓄᓇᓕᖏᓐᓄᑦ, ᐊᑐᖁᔨᓪᓗᑕ ᐱᐅᓛᕐᒥᒃ ᑲᓱᖅᑕᕈᑎᓂᑦ ᖃᕋᓴᐅᔭᕐᓄᑦ ᐃᑭᐊᖅᑭᔾᔪᑎᓄ ᐱᐅᓛᕐᓃᑎᑕᐅᓗᑎᑦ ᓈᒻᒪᓛᕐᒥ ᐊᒻᒪᓗ ᑲᔪᖏᖅᓴᐃᓪᓗᑕ ᐊᑭᑦᑐᕋᐅᑎᓂᕐᒥᒃ ᐊᒻᒪᓗ ᖃᓄᖅᑑᕈᑎᒋᔭᐅᖁᓪᓗᒍᓗ ᐊᑐᖅᑕᐅᓂᐊᓕᖅᑎᓪᓗᒍ ᐃᑭᐊᖅᑭᔾᔪᑎ ᖃᓄᐃᓕᖓᓂᖓ.

ᓄᓇᕗᑦ ᐅᓪᓗᒥᐅᔪᖅ ᐱᔨᑦᑎᖅᑕᐅᒻᒪᑦ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᑭᓯᐊᓂ ᐊᒻᒪᓗ ᐱᔨᑦᑎᖅᑕᐅᔪᓐᓇᕋᔭᙱᑦᑐᒥᓂᐅᕗᒍᑦ ᐅᓪᓗᒥᐅᔪᖅ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐃᑭᐊᖅᑭᔾᔪᑎᑖᖅᑎᑦᑎᓯᒪᓐᓂᖏᒃᑯᑦᑕ.  ᑭᓯᐊᓂᓕ ᑕᒪᓐᓇ ᑐᑭᖃᙱᓚᖅ ᓯᕗᒧᐊᑦᑕᕆᐊᖃᕐᓂᑎᓐᓂᑦ.  ᑕᐃᒪᐃᓐᓂᖓᓄᑦ 2011−ᖑᑎᓪᓗᒍ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐱᒋᐊᖅᑎᑦᑎᖁᔨᓚᐅᖅᓯᒪᕗᖅ ᓄᑭᓪᓚᐅᑏᑦ ᓱᑲᓐᓂᖅᓴᑦ ᐊᑐᕋᒃᓴᐅᒻᒪᖔᑕ ᖃᐅᔨᓴᖁᔨᓪᓗᓂ ᓈᒻᒪᑦᑐᒥᒃ ᐅᓪᓗᒥᐅᔪᕐᓗ ᑐᑭᓯᒋᐊᕈᑎᓂᑦ ᐊᑐᕐᓗᓂ ᐱᑕᖃᖃᑦᑕᕐᓂᐊᕐᒪᑦ ᖃᐅᔨᓴᖅᑕᐅᖁᔨᓪᓗᓂ ᐅᑯᓂᖓ ᐊᑭᖏᓐᓂᑦ, ᐊᒃᓱᕈᕈᑕᐅᒐᔭᖅᑐᓂᑦ ᐊᒻᒪᓗ ᐃᑲᔫᑎᒋᔭᐅᒐᔭᖅᑐᓂᑦ ᐱᐅᓂᖅᓴᓂᑦ ᐃᑭᐊᖅᑭᔪᓐᓇᐅᑎᑕᖃᕐᓂᕈᓂ ᑲᓱᖅᑕᕈᑎᓂᑦ ᓄᑖᖑᓂᖅᓴᓂᑦ ᐊᑐᕐᓗᓂ, ᐱᓗᐊᖅᑐᒥᒃ ᓄᑭᓪᓚᐅᑎ ᐃᔾᔪᑎᓂᖅᓴᑦ, ᓄᑭᓪᓚᐅᑎᖃᕆᐊᖃᙱᑦᑐᒃᑯᑦ ᓄᑖᖑᓂᖅᓴᓂᓪᓗ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐊᑐᕋᒃᓴᓂᑦ ᐊᑐᖔᕐᓂᕈᑎᑦ. ᑲᓛᖡᑦ ᓄᓈᓐᓂ ᐆᑦᑑᑎᒋᓗᒍ, ᐊᔾᔨᒌᐸᓗᒃᑐᑦᑎᐊᓂᒃ ᐊᒃᓱᕈᕈᑎᖃᖅᑎᓪᓗᑕ ᐊᑲᐅᙱᓕᐅᕈᑎᓂᓪᓗ, ᐊᔾᔨᒌᙱᑐᒡᒍᑕᐅᕗᑦ ᐱᓕᕆᔾᔪᑎᖏᑦ − ᖁᒻᒧᐊᑦᑎᑕᐅᓯᒪᔪᒃᑯᑦ, ᓄᑭᓪᓚᐅᑎᒃᑯᑦ, ᓄᑭᓪᓚᐅᑎᖃᙱᑦᑐᒃᑯᑦ ᐃᑭᐊᖅᑭᔾᔪᑎᓕᕆᔾᔪᑎᓂᒃ ᐱᖃᖅᑐᑎᑦ ᐊᑐᖃᑦᑕᖅᑐᑎᑦ.  ᐊᑐᖅᑐᑎᑦ ᐱᐅᓛᕐᓂᑦ ᓈᒻᒪᓛᕐᒦᑎᑕᐅᓪᓗᑎᑦ ᖃᕋᓴᐅᔭᓕᕆᔾᔪᑏᑦ ᐊᒻᒪᓗ ᐊᔾᔨᒌᑦᑐᒡᒍᑕᕐᓂᑦ ᐱᔨᑦᑎᕋᖅᑐᑎᑦ ᓄᓇᖓᓂ ᑕᐃᒪᐃᑉᐳᑦ.

ᐅᖃᑐᐃᓐᓇᕐᓗᒍ: ᖃᕋᓴᐅᔭᓕᕆᔾᔪᑏᑦ ᖃᓄᐃᑦᑑᔭᕆᐊᖃᙱᑦᑐᑦ, ᐃᓄᓐᓄᑦ ᑭᒃᑯᑐᐃᓐᓇᕐᓄᑦ ᐊᑐᐊᒐᓕᐊᕆᔭᐅᓱᑦ ᐊᓯᔾᔨᕈᑎᑦ ᐱᐅᓂᖅᓴᕈᕈᓐᓇᖅᑐᑦ.  ᓂᕈᐊᖅᑕᐅᓯᒪᔪᑦ ᐱᔪᒪᓂᖃᕆᐊᓖᑦ ᓈᒻᒪᑦᑐᑎᒍᓪᓗ ᑮᓇᐅᔭᓂᒃ ᐃᑲᔫᓯᐊᖅᑖᕐᓗᑕ ᖃᐅᔨᒪᓇᑦᑎᐊᖁᓪᓗᒍ ᑕᒪᐃᓐᓂ ᓄᓇᕗᒥᐅᑦ ᓈᒻᒪᑦᑐᒃᑯᑦ, ᐊᑭᑐᓗᐊᙱᑐᒃᑯᑦ ᓇᓕᒧᒌᑦᑐᒃᑯᓪᓗ ᑐᓴᐅᒪᖃᑎᒌᔪᓐᓇᕈᑎᖏᑦ ᐱᔨᑦᑎᖅᑕᐅᔪᓐᓇᖁᓪᓗᒋᑦ ᑲᓱᖅᑕᕈᑎᖏᑦ ᐃᑭᐊᖅᑭᔾᔪᑎᓕᕆᔾᔪᑦ ᖃᓄᐃᑦᑑᒐᓗᐊᖅᐸᑕ.

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᓂᐅᕕᕐᕕᐅᕗᖅ ᑐᑭᖓ ᓂᐅᕕᖅᑎᑦᑎᔨᑉ ᒪᓕᑦᑐᒍ ᐊᒻᒪᓗ ᖃᕋᓴᐅᔭᓕᕆᔾᔪᑎᓄᑦ ᖃᓄᐃᑦᑑᒐᔭᕐᓂᖏᓐᓂᒃ ᐃᓱᒪᓕᐅᖃᑦᑕᕋᓂ ᐊᔭᐅᕆᖔᓲᖑᕗᒍᑦ ᐊᒻᒪᓗ ᐅᐊᑦᑎᔨᐅᓪᓗᑕ ᑐᑭᓯᒋᐊᕈᑎᓕᕆᔾᔪᑎᑎᒍᑦ ᐱᓕᕆᐊᖃᖃᑦᑕᖅᑐᓂᑦ.  ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᓄᓇᕗᒦᑦᑐᖅ, ᐊᐅᓚᑕᐅᓪᓗᓂ ᓄᓇᕗᒥᐅᑕᕐᓄᑦ, ᐊᒻᒪᓗ ᑭᒡᒐᖅᑐᐃᓪᓗᓂ ᑕᒪᐃᓐᓂᑦ ᐱᔪᒪᔭᖏᓐᓂᑦ ᓄᓇᕗᒥᐅᑦ ᐃᑭᐊᖅᑭᔾᔪᑎᓂᑦ ᐊᑐᓲᕐᓄᑦ, ᐱᖃᓯᐅᑎᓪᓗᒋᑦ ᓄᓇᕗᒥᐅᑕᐅᔪᑦ, ᓇᒻᒥᓂᖃᖅᑐᑦ, ᑲᑐᔾᔨᖃᑎᒌᑦ, ᐊᒻᒪᓗ ᓄᓇᓖᑦ ᒐᔭᒪᖏᑦ − ᐊᑐᖅᐸᑦᑐᑦ ᐃᑭᐊᖅᑭᔾᔪᑎᓂᑦ ᐊᑐᐃᓐᓇᐅᒪᑎᑕᐅᙱᑦᑐᑎᑦ ᒐᕙᒪᒃᑯᓐᓄᑦ ᐅᕝᕙᓘᓐᓃᑦ ᐊᓯᐊᓄᑦ ᐊᖏᔪᓄᑦ, ᓇᒻᒥᓂᕆᔭᐅᔪᓄᑦ ᐃᑭᐊᖅᑭᔾᔪᑎᓕᕆᕙᒃᑐᓄᑦ.

ᖃᐅᔨᒪᔪᒃᓴᐅᕗᑦ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓᑕ ᓯᕗᓪᓕᖅᐹᕐᒥᒃ ᐊᖏᔪᐊᓗᒻᒥᒃ ᐱᓕᕆᐊᖃᓚᐅᖅᓯᒪᓂᖓᓂᒃ, ᕿᓂᖅ ᖃᕋᓴᐅᔭᓕᕆᔨᒃᑯᑦ.  ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᑮᓇᐅᔭᖅᑖᕈᓐᓇᓚᐅᖅᓯᒪᔪᑦ ᐃᑲᔫᑎᒃᓴᓂᑦ ᕿᓂᖅ ᓴᓇᔭᐅᖁᓪᓗᒍ ᐊᒻᒪᓗ ᐱᔨᑦᑎᕋᖁᓪᓗᒍ ᓄᓇᕗᑉ ᓄᓇᓕᓕᒫᖏᓐᓄᑦ.

ᑖᓐᓇ ᐃᓚᒋᕚᑉ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓᑕ ᐱᓕᕆᐊᕆᓗᐊᖅᐸᑦᑕᖏᑕ: ᖃᐅᔨᒪᑦᑎᐊᖅᑎᑦᑎᓪᓗᑎᑦ ᑮᓇᐅᔭᑎᒍᑦ ᐊᑐᖅᑐᖃᕐᒪᑦ ᓴᓇᔭᐅᖁᓪᓗᒋᑦ ᐃᑭᐊᖅᑭᔾᔪᑎᓕᕆᓂᕐᒧᑦ ᐱᖁᑎᕐᔪᐊᖑᔪᑦ ᐊᒻᒪᓗ ᐱᔨᑦᑎᕋᕈᑏᑦ ᓄᑖᕈᕆᐊᖅᑎᑕᐅᖃᑦᑕᖁᓪᓗᒋᑦ ᐃᓄᐃᑦ ᑭᒃᑯᑐᐃᓐᓇᐃᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐱᔪᒪᔭᖏᑦ ᓄᓇᕗᒥ ᒪᓕᓪᓗᒋᑦ.

2003-2016-ᒥ, ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐊᐅᓚᑦᑎᓯᒪᓛᓕᖅᑐᖅ $66 ᒥᓕᐊᓐ−ᓂᒃ ᐃᑭᐊᖅᑭᔪᓐᓇᐅᑎᓕᕆᔾᔪᑎᓄᑦ ᓄᓇᕗᒥ, ᒐᕙᒪᑐᖃᒃᑯᓐᓂᑦ ᑮᓇᐅᔭᖅᑖᕆᓯᒪᓗᐊᙳᐊᖅᑐᓂᒋᑦ ᐃᑲᔫᑏᑦ, ᑮᓇᐅᔭᖅᑖᕈᓐᓇᖃᑦᑕᕐᓂᑰᓪᓗᑎᑦ ᐊᔾᔨᒌᙱᑦᑐᑎᒍᑦ ᒐᕙᒪᑐᖃᒃᑯᑦ ᐱᓕᕆᐊᖏᑎᒍᑦ, 2003-2016-ᒥ, ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐊᐅᓚᑦᑎᓯᒪᓛᓕᖅᑐᖅ $66 ᒥᓕᐊᓐ−ᓂᒃ ᐃᑭᐊᖅᑭᔪᓐᓇᐅᑎᓕᕆᔾᔪᑎᓄᑦ ᓄᓇᕗᒥ, ᒐᕙᒪᑐᖃᒃᑯᓐᓂᑦ ᑮᓇᐅᔭᖅᑖᕆᓯᒪᓗᐊᙳᐊᖅᑐᓂᒋᑦ ᐃᑲᔫᑎᓂᑦ ᐱᓕᕆᐊᒃᑯᑦ, ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐅᑉᐱᕈᓱᒃᑐᑦ ᑕᒪᐃᓐᓂᑦ ᑭᓱᑐᐃᓐᓇᐃᑦ ᐃᓱᒪᒋᒋᐊᕐᓗᒋᑦ ᐋᖅᑭᒃᓱᐃᓇᓱᒋᐊᓖᑦ ᐊᒻᒪᓗ ᐃᓱᒪᒋᐊᕐᓗᑎᑦ ᐊᑯᓂᐅᔪᒧᑦ ᓯᕗᓂᒃᓴᒧᑦ ᐊᑐᖅᑕᐅᔪᓐᓇᕋᔭᖅᑐᓂᑦ ᐅᑭᐅᖅᑕᖅᑐᒥᐅᑦ ᐃᒪᐃᓐᓂᐊᑐᐊᕈᑎᑦ, ᐅᖃᐅᓯᖏᑦ ᒪᓕᓪᓗᒋᑦ ᑲᓇᑕᒥ ᓈᓚᐅᑎᓕᕆᔩᑦ-ᑕᓚᕖᓴᓕᕆᔨᒃᑯᓪᓗ ᐊᒻᒪᓗ ᑐᓴᐅᒪᖃᑦᑕᐅᑎᔪᓕᕆᔩᑦ ᑲᑎᒪᔨᖏᑦ, “ᐱᔨᑦᑎᖅᑕᐅᒍᓐᓇᕐᓗᑎᑦ ᑐᓴᐅᒪᖃᑦᑕᐅᑎᓕᕆᔾᔪᑎᑎᒍᑦ, ᑕᒪᒃᑮᒃ ᒪᓕᒐᓕᐅᕈᑕᐅᓯᒪᓗᑎᑦ ᐊᒻᒪᓗ ᓄᖅᑲᖓᑎᑕᐅᓯᒪᔭᕆᐊᓖᑦ ᐱᐅᙱᑦᑐᑦ ᓄᖅᑲᖓᑎᑕᐅᓯᒪᓗᑎᑦ, ᓇᓕᒧᒌᓪᓗᑎᑦ ᐊᑐᐃᓐᓇᐅᔪᑦ ᑲᓇᑕᑉ ᓂᒋᐊᓂ ᒪᓕᓪᓗᒋᑦ ᐊᑐᐃᓐᓇᐅᒪᑎᑦᑎᕕᐅᓂᖏᑦ ᐊᔾᔨᒋᓗᒋᑦ ᓲᕐᓗ ᓂᕈᐊᕈᓐᓇᕐᓂᕐᒥᓂᒃ, ᐱᐅᔫᓂᖓᓂᒃ ᐊᒻᒪᓗ ᑕᑎᒋᔭᒃᓴᐅᓂᖓᓂᒃ”.  ᐊᒻᒪᓗ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐃᓚᒋᐊᖅᓯᒐᔭᕐᒥᔪᖅ ᐊᑭᑐᓗᐊᙱᓪᓗᓂ.

ᐅᑯᐊ ᑕᕝᕙ ᐱᓕᕆᐊᕆᕋᑖᕐᓂᑯᕆᕙᕗᑦ:

  • ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐱᖃᑕᐅᖃᑦᑕᕐᓂᑰᕗᖅ ᑲᓇᑕᒥ ᓈᓚᐅᑎᓕᕆᓂᕐᒧᑦ ᑕᓚᕖᓴᓕᕆᓂᕐᒧᓪᓗ ᑲᑎᒪᔨᖏᑦ ᕿᒥᕐᕈᓚᐅᖅᑎᓪᓗᒋᑦ ᓄᐊᔅᕕᔅᑎᐅᓪ ᓄᑖᕈᕆᐊᖅᑎᑦᑎᓂᖏᑦ ᐸᕐᓇᐅᑎᓕᐅᖅᑐᑎᑦ, ᐊᔭᐅᕆᓪᓗᑕ ᐊᓯᔾᔨᖅᑕᐅᖁᓪᓗᒋᑦ ᐅᓪᓗᒥᐅᔪᖅ ᒪᓕᒐᕋᓛᖏᑦ ᐊᒻᒪᓗ ᑮᓇᐅᔭᖃᖅᑎᑕᐅᓂᕐᒧᑦ ᑐᙵᕕᖏᑦ ᖃᐅᔨᒪᓇᑦᑎᐊᖁᓪᓗᒍ ᑐᓴᐅᒪᖃᑎᒌᔾᔪᑎᒃᑯᑦ ᐱᔨᑦᑎᖅᑕᐅᓂᖏᑦ ᐅᑭᐅᖅᑕᖅᑐᒥ ᐊᔾᔨᖃᕋᓗᐊᕐᒪᖔᑕ ᐊᙳᑎᓗᑎᓪᓗ ᑲᓇᑕᑉ ᓂᒋᐊᓂ ᐊᑐᖅᑕᐅᕙᑦᑐᓂᑦ.
  • 2012−ᒥ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐋᖅᑭᒃᓱᐃᓚᐅᖅᑐᖅ ᓄᓇᕘᒥ ᓯᕗᓪᓕᐹᑦᑎᐊᕐᒥ ᑐᑭᓯᒋᐊᕈᑎᓕᕆᓂᕐᒧᑦ ᑐᓴᐅᒪᖃᑎᒌᓐᓂᕐᒧᑦ ᖃᕋᓴᐅᔭᖅᑎᒍᑦ ᑲᑎᒪᕕᔾᔪᐊᕐᓂᕐᒥᒃ, 70−ᐅᔪᑦ ᑲᑎᒪᔭᖅᑐᖃᑎᒌᑦᑐᑎᑦ ᒐᕙᒪᒃᑯᓃᙶᖅᑐᑦ, ᐃᓄᐃᑦ ᑲᑐᔾᔨᖃᑎᒌᖏᓐᓂᑦ, ᖃᕋᓴᐅᕐᓅᖓᔪᓕᕆᔨᑦ, ᐱᔨᑦᑎᕋᖅᑏᑦ ᐃᑭᐊᖅᑭᔾᔪᑎᓂᑦ ᐊᑐᐃᓐᓇᐅᒪᑎᑦᑎᔪᑦ ᐊᒻᒪᓗᑦᑕᐅᖅ ᐃᓄᐃᑦ ᑭᒃᑯᑐᐃᓐᓇᐃᑦ ᓄᓇᕗᒦᙶᖅᑐᑦ ᑲᓇᑕᒥᓗ.  ᑲᑎᒪᕕᔾᔪᐊᖅᑎᓪᓗᒋᑦ ᐅᖃᓯᖃᓗᐊᙳᐊᓚᐅᖅᑐᑦ ᐊᒥᓱᓂᑦ ᐊᖏᔪᓂᓪᓗ ᐱᔾᔪᑎᓂᑦ ᑲᒪᒋᔭᐅᔭᕆᐊᓖᑦ ᓯᕗᒧᐊᒍᓐᓇᖁᓪᓗᒍ ᖃᓄᐃᓕᖓᓂᖓ ᑐᑭᓯᒋᐊᕈᑎᓕᕆᔾᔪᑏᑦ ᑐᓴᐅᒪᖃᑎᒌᔾᔪᑏᓪᓗ ᖃᕋᓴᐅᔭᕐᓅᖓᔪᑦ ᓄᓇᕗᒥ.  ᓄᓇᕘᒥ ᑐᑭᓯᒋᐊᕈᑎᓕᕆᓂᕐᒧᑦ ᑐᓴᐅᒪᖃᑦᑕᐅᑎᓕᕆᓂᕐᒧᓪᓗ ᖃᕋᓴᐅᔭᒃᑯᑦ ᐱᓕᕆᔩᑦ ᓴᖅᑭᖅᑎᑕᐅᓚᐅᖅᑐᖅ ᑲᑎᒪᕕᔾᔪᐊᖅᑎᓪᓗᒋᑦ ᐋᖅᑭᒃᓱᐃᖁᓪᓗᒋᑦ ᐊᑯᓂᐅᔪᒧᑦ ᖃᓄᖅᑑᕈᑎᒥ ᓄᓇᕗᒧᑦ.
  • 2011−ᖑᑎᓪᓗᒍ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐱᒋᐊᖅᑎᑦᑎᖁᔨᓚᐅᖅᓯᒪᕗᖅ ᓄᑭᓪᓚᐅᑏᑦ ᓱᑲᓐᓂᖅᓴᑦ ᐊᑐᕋᒃᓴᐅᒻᒪᖔᑕ ᖃᐅᔨᓴᖁᔨᓪᓗᓂ ᐊᒻᒪᓗ ᐃᑭᐊᖅᑭᔾᔪᑎ ᐃᓅᓯᖃᑦᑎᐊᕐᓂᕐᒧᑦᐱᕙᓪᓕᐊᓂᕐᒧᓪᓗ ᐊᑦᑐᐃᓂᖃᕐᖓ ᖃᐅᔨᓴᕆᐊᖅᑎᑦᑎᓚᐅᕆᓪᓗᓂ.  ᐅᓂᒃᑳᒨᖅᑕᐅᔪᑦ ᖃᐅᔨᔭᒥᓃᑦ ᐃᑲᔪᕋᔭᖅᑐᑦ ᑐᑭᓯᒋᐊᕐᓗᑎᑦ ᓯᕗᓂᒃᓴᒧᑦ ᐅᑭᐅᖅᑕᖅᑐᒥ ᑐᓴᐅᒪᖃᑎᒌᒍᑎᓄᑦ ᐊᑐᐊᒐᓕᐅᖅᑐᖃᓕᖅᐸᑦ ᑲᒪᒋᔭᐅᓗᑎᑦ ᖃᐅᔨᒪᔭᐅᙱᑦᑐᑦ, ᖃᐅᔨᓵᕐᒧᓪᓗ ᓄᑭᓪᓚᐅᑎᓂᑦ ᓱᑲᓐᓂᖅᓴᓂᑦ ᐋᖅᑮᔪᖃᕈᓂ ᖃᓄᐃᓕᖓᒐᔭᕐᒪᖔᖅ ᖃᐅᔨᓵᖅ, ᐊᒻᒪᓗ ᑕᑯᒃᓴᐅᑎᑦᑎᒍᑦᑕ ᐃᓅᓯᖃᑦᑎᐊᕐᓂᕐᒧᑦᐱᕙᓪᓕᐊᓂᕐᒧᓪᓗ ᐃᑲᔪᕐᓂᖃᕋᔭᕐᓂᖏᑦ ᐃᑭᐊᖅᑭᔾᔪᑎᖃᕈᓂ ᓄᓇᕗᒥ, ᐃᓅᓯᖃᑦᑎᐊᕐᓂᕐᒧᑦᐱᕙᓪᓕᐊᓂᕐᒧᓪᓗ ᐊᑦᑐᐃᓂᖃᕐᓂᖏᑦ ᖃᐅᔨᓵᕐᒧᑦ.
  • 2012-2013−ᒥ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ, ᐱᓕᕆᖃᑎᖃᖅᑐᑎᑦ ᑲᓇᑕᒥ ᑐᓵᙱᑦᑐᑦ ᖃᐅᔨᓴᖅᑕᐅᓂᖏᑦ ᐊᒻᒪᓗ ᐱᓕᒻᒪᓴᕐᕕᒃ, ᐆᑦᑐᕋᖅᑐᑎᑦ ᐱᓕᕆᐊᖃᓚᐅᖅᑐᑦ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐅᖓᓯᒃᑐᒃᑯᑦ ᖃᕋᓴᐅᔭᒃᑯᑦ ᑕᑯᒃᓴᐅᑦᑕᐅᑎᒋᓗᓂ ᐊᑐᕋᒃᓴᖏᓐᓂᒃ ᑐᑭᓯᐅᒪᖃᑎᒌᑦᑎᑦᑎᒍᑕᐅᓂᐊᖅᑐᖅ ᑐᓵᙱᑦᑐᓄᑦ ᓄᓇᕗᒥ.  ᐱᓕᕆᐊᕆᔭᐅᒃᑲᓐᓂᕐᓂᐊᕋᓱᒋᔭᐅᕗᖅ ᐊᕐᕌᒎᓛᖅᑐᒥ ᖃᓄᐃᓕᖓᓕᕐᒪᖔᖅ ᖃᐅᔨᒋᐊᕐᓗᑎᑦ.
  • ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐱᓕᕆᐊᖃᓲᖑᒋᕗᑦ ᐃᑲᔪᖅᑐᐃᓪᓗᑎᑦ ᐱᕙᓪᓕᐊᓂᖓᑕ ᓄᓇᓕᓐᓂ ᑐᑭᓯᒋᐊᕈᑎᓕᕆᓂᖅ ᑐᓴᐅᒪᖃᑦᑕᐅᑎᔾᔪᑎᓕᕆᓂᕐᓗ ᖃᕋᓴᐅᔭᖅᑎᒍᑦ.  2013-ᖑᑎᓪᓗᒍ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐋᖅᑭᒃᓱᐃᓚᐅᖅᑐᑦ ᑲᔪᓯᓂᖃᑦᑎᐊᖅᑐᒻᒪᕆᐅᓪᓗᓂᓗ ᖃᕋᓴᐅᔭᓕᕆᓂᕐᒧᑦ ᐃᑭᐊᖅᑭᕕᓕᐅᕐᓂᕐᒧᓪᓗ ᐃᓕᓐᓂᐊᖅᑎᑦᑎᓪᓗᑎᑦ ᐊᒻᒪᓗ ᐊᓯᖏᑦ ᐃᓕᓐᓂᐊᕋᒃᓴᐅᔪᑦ ᐋᖅᑭᓱᖅᑕᐅᕙᓪᓕᐊᕗᑦ.

ᑕᑯᓂᐊᕈᒪᒍᕕᑦ ᑎᑎᖅᑐᖅᓯᒪᔪᓂᑦ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓᑕ ᐱᓕᕆᐊᕆᓯᒪᓕᖅᑕᖏᑦ ᐅᓪᓗᒥᒧᑦ ᑎᑭᑦᑐᒍ, ᕿᒥᕐᕈᒋᐊᕐᓗᒋᑦ ᐱᓕᕆᐊᑦ ᒪᑉᐱᒐᖓ.

2019 ᐅᖓᓯᑦᑐᐊᓘᔮᕈᓐᓇᕐᒪᑦ, ᑭᓯᐊᓂᓕ ᑭᓱᑐᐃᓐᓇᕐᒥᒃ ᐋᖅᑮᓯᒪᖁᔨᒍᑦᑕ ᑮᓇᐅᔭᖅᑖᕆᕙᒃᑕᕗᑦ ᐃᓱᓕᒃᓯᒪᓕᖅᑎᓪᓗᒋᑦ, ᐱᓕᕆᐊᖃᕆᐊᖃᓕᖅᑐᒍᑦ ᒫᓐᓇ.  ᑭᓯᐊᓂᓕ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐃᓱᒪᕗᑦ ᐊᑯᓂᐅᓂᖓ 3-4 ᐊᕐᕌᒍᑐᐃᓐᓇᐅᔭᕆᐊᖃᙱᒻᒪᑕ, ᐊᓯᐊᓂᒃ ᕿᓚᒥᐅᔪᒃᑯᑦ ᐋᖅᑮᒍᑎᒃᓴᑐᐃᓐᓇᐅᒻᒪᑦ ᐊᑯᓂᐅᔪᒧᑦ ᐊᑲᐅᙱᓕᐅᕈᑕᐅᒐᔭᖅᑐᒧᑦ.  ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐱᓕᕆᓯᒪᕗᑦ ᐊᒥᓱᓂᑦ ᐊᑯᓂᐅᔪᒧᑦ ᐋᖅᑭᒍᑎᒃᓴᓂᑦ ᐋᖅᑭᒃᓱᐃᓇᓱᒃᑐᑎᑦ.  ᐅᑯᐊᖑᕗᑦ ᐋᖅᑮᔾᔪᑎᒋᓇᓱᖃᑦᑕᕐᓂᑯᖏᑦ:

  • ᖃᐅᔨᓴᕐᓗᑎᑦ ᐊᓯᐊᒍᑦ ᓇᒻᒥᓂᖃᕈᓐᓇᕋᔭᕐᒪᖔᑕ ᐊᐅᓚᑦᑎᔾᔪᓰᓪᓗ, ᓲᕐᓗ ᑐᓴᐅᒪᖃᑦᑕᐅᑎᓕᕆᔾᔪᑎᖏᑦᑲᓛᖡᑦᓄᓈᓐᓂ ᐊᑐᓲᖓ ᐊᑐᖔᕐᓂᕈᑦᑎᒍ ᐱᕕᒃᓴᐅᒐᔭᕐᒪᖔᖅ ᖃᐅᔨᓴᕐᓗᑕ.

ᐊᒥᓱᑦ ᓄᓇᕘᒥ ᓄᓇᓕᖏᑦ ᐃᓄᓐᓄᑦ ᑭᒃᑯᑐᐃᓐᓇᕐᓄᑦ ᐅᐸᒃᑕᐅᔪᓐᓇᖅᑐᖅᑕᓖᓐᓇᐅᕗᑦ, ᐅᖃᓕᒫᒐᖃᕐᕕᒻᒥ ᐱᓗᐊᖅᑐᖅ ᐅᕝᕙᓘᓐᓃᑦ ᐃᓕᓐᓂᐊᕐᕕᒻᒥ ᖃᕋᓴᐅᔭᖅᑕᓕᒃ ᐃᑭᐊᖅᑭᕕᓐᓂ ᕿᒥᕐᕈᔭᖅᑐᕐᕕᒃᓴᑦ.  ᑕᑯᓂᐊᕐᓗᒋᑦ ᐅᑯᐊ ᑭᒃᑯᑦ ᖃᕋᓴᐅᔭᓂᑦ ᐊᑐᕈᓐᓇᑎᑦᑎᒻᒪᖔᑕ ᓄᓇᕘᒥ ᐃᓄᓐᓄᑦ ᑭᒃᑯᑐᐃᓐᓇᕐᓄᑦ ᐊᑐᕐᕕᒃᓴᑦ.

ᑐᑭᓯᒋᐊᕈᑎᓕᕆᓂᕐᒧᑦ ᑐᓴᐅᒪᖃᑦᑕᐅᑎᓕᕆᓂᕐᒧᓪᓗ ᖃᕋᓴᐅᔭᒃᑯᑦ ᐱᓕᕆᕝᕕᐅᕙᒃᑐᑦ ᓄᓇᕗᒥ ᐱᕈᖅᐸᓪᓕᐊᑐᐃᓐᓇᕐᒪᑦ ᐊᒻᒪᓗ ᖃᑦᑏᓐᓇᐅᓗᐊᖅᑐᑎᑦ ᖃᕋᓴᐅᔭᓕᕆᕙᒃᑐᑦ ᑐᑭᓯᒋᐊᕈᑎᓕᕆᕙᒃᑐᓪᓗ ᐃᖅᑲᓇᐃᔭᖅᑎᖏᑦ ᓲᕐᓗ ᐃᖅᑲᓇᐃᔭᓕᓵᖅᑐᑦ, ᐊᖓᔪᖅᑳᖑᓂᖅᓴᐃᑦ ᖃᐅᔨᒪᓂᖅᓴᐅᓂᖏᓐᓄᑦ, ᐃᖅᑲᓇᐃᔮᓖᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᓂᖅ, ᖃᕋᓴᐅᔭᕐᓄᑦ ᐊᑐᖅᑕᐅᓲᑦ ᐋᖅᑭᓱᖅᑕᐅᓂᖏᑦ, ᐊᒻᒪᓗ ᐃᑭᐊᖅᑭᔾᔪᑎᓕᕆᓂᕐᒧᑦ ᐊᐅᓚᑦᑎᓂᖅ.  ᐊᒥᓲᓛᕐᒪᑕ ᐃᖅᑲᓇᐃᔮᒃᓴᑦ ᓄᓇᓕᓐᓂᒥᐅᓄᑦ ᓄᓇᕗᒥ ᐃᓄᐃᑦ ᑭᒃᑯᑐᐃᓐᓇᐃᑦ, ᓇᒻᒥᓂᖃᖅᑐᑦ ᒐᕙᒪᒃᑯᓪᓗ ᐊᑐᕐᓂᖅᓴᐅᖃᑦᑕᓕᕈᑎᑦ ᖃᕋᓴᐅᔭᕐᓂᑦ ᐊᒻᒪᓗ ᐃᓄᐃᑦ ᖃᐅᔾᔨᐊᓪᓚᒃᑯᑎᑦ ᖃᕋᓴᐅᔭᓕᕆᓂᕐᒥᑦ ᐱᓕᕆᐊᓖᑦ ᐃᖅᑲᓇᐃᔭᕐᕕᒃᓴᐅᓂᖏᓐᓂᑦ, ᐊᒻᒪᓗ ᐱᓕᒻᒪᒃᓴᕆᐊᖃᕐᓂᖏᑦ ᐃᓕᓐᓂᐊᖅᓯᒪᔭᕆᐊᖃᕐᓂᖏᓐᓄᑦ ᖃᕋᓴᐅᔭᓕᕆᓂᕐᒥᒃ ᐱᒋᐊᑐᐊᕈᑎᑦ ᐃᖅᑲᓇᐃᔮᒃᓴᑦ ᐊᒥᓱᒻᒪᕆᐅᒐᔭᖅᑐᑦ.

ᑐᑭᓯᒋᐊᒃᑲᓐᓂᕈᒪᓐᓂᕈᕕᑦ ᑐᑭᓯᒋᐊᕈᑎᓕᕆᓂᕐᒧᑦ ᑐᓴᐅᒪᖃᑦᑕᐅᑎᓕᕆᓂᕐᒧᓪᓗ ᖃᕋᓴᐅᔭᒃᑯᑦ ᐱᓕᕆᐊᖃᓲᑦ ᐃᖅᑲᓇᐃᔮᒃᓴᑦ, ᕿᒥᕐᕈᒃᑭᑦ ᐃᖅᑲᓇᐃᔮᑦ ᖃᓄᐃᑦᑑᓂᖏᑦ focusIT.ca.

ᓄᓇᕘᒥ, ᓄᓇᕘᒥ ᓯᓚᑦᑐᓴᕐᕕᖓ ᐃᓕᓐᓂᐊᖅᑎᑦᑎᓲᑦ ᒪᕐᕉᓐᓄᒃ ᐊᕐᕌᒎᓐᓄᒃ ᐊᑯᓂᐅᑎᒋᔪᖅ ᖃᕋᓴᐅᔭᓕᕆᔨᐅᓂᕐᒧᑦ ᐃᓕᓐᓂᐊᕋᒃᓴᖅ.

ᐱᓕᒻᒪᒃᓴᕈᓐᓇᕐᒥᔪᑎᑦ ᖃᕋᓴᐅᔭᖅᑎᒍᑦ ᐃᓕᓐᓂᐊᕐᓗᑎᑦ.  ᐆᑦᑑᑎᒋᓗᒍ, ᐋᑕᕚᔅᑲ ᓯᓚᑦᑐᓴᕐᕕᕐᔪᐊᖓ ᖃᕋᓴᐅᔭᓕᕆᓂᕐᒧᑦ ᐊᒻᒪᓗ ᑐᑭᓯᒋᐊᕈᑎᓕᕆᓂᕐᒧᑦ ᖃᕋᓴᐅᔭᖅᑎᒍᑦ ᐃᓕᓐᓂᐊᖅᑎᑦᑎᓲᑦ ᐊᔾᔨᒌᙱᑦᑐᕈᓘᔭᕐᓂᑦ ᐃᓕᓴᕆᔭᐅᔾᔪᑎᑖᕈᓐᓇᖅᑐᑎᓪᓗ ᐊᔾᔨᒌᙱᑦᑐᓂᑦ ᐱᔪᒪᔭᐃᑦ ᒪᓕᑦᑐᒍ ᐅᖓᓯᑦᑐᒦᒃᑲᓗᐊᕈᕕᑦ ᐃᓕᓐᓂᐊᕐᓗᑎᑦ ᖃᕋᓴᐅᔭᒃᑯᑦ..

ᐊᒻᒪᓗᑦᑕᐅᖅ, ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐋᖅᑭᒃᓱᐃᓚᐅᑲᓲᖅ ᐃᓕᓐᓂᐊᕋᒃᓴᓂᑦ.  ᖃᐅᔨᒋᐊᕐᕕᒋᑎᒍᑦ ᑭᓱᑐᐃᓐᓇᕐᒥᒃ ᐃᓕᓐᓂᐊᕈᒪᓐᓂᕈᕕᑦ ᐅᕝᕙᓘᓐᓃᑦ ᖃᐅᔨᒋᐊᕈᒪᒍᕕᑦ ᐃᓕᓐᓂᐊᕋᒃᓴᖅᑕᖃᓛᓕᕐᒥᒻᒪᖔᖅ ᖃᓄᐃᑦᑐᓂᑦ.

ᐄ’, ᐱᙳᖅᓯᒪᕗᒍᑦ ᑖᓐᓇ ᐱᓪᓗᒍ.  ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐃᖅᑲᓇᐃᔮᓕᒃ ᓴᐳᔾᔨᓇᓱᒃᑐᓂ ᐱᔪᓐᓇᐅᑎᖏᓐᓂᒃ ᐱᔪᒪᔭᖏᓐᓂᓪᓗ ᓄᓇᕗᒥᐅᑕᓂᑦ ᐃᑭᐊᖅᑭᔾᔪᑎᓂᒃ ᐊᑐᖅᐸᑦᑐᓂᑦ.  ᐱᔨᑦᑎᕋᖅᑕᐅᓇᓱᒋᙱᒃᑯᕕᑦ ᐊᑭᓕᖅᓱᖅᑕᕐᓄᑦ ᐅᕝᕙᓘᓐᓃᑦ ᐊᓯᖏᓐᓂᒃ ᐅᓐᓂᕐᓘᑎᖃᕈᒪᒍᕕᑦ, ᖃᐅᔨᒋᐊᕐᕕᒋᑎᒍᑦ.