Latest News
ᑲᓇᑕᒥ ᑐᓴᐅᒪᖃᑎᒌᓐᓂᕐᒧᑦ ᓈᓚᐅᑎᒃᑯᑦ ᐅᖄᓚᐅᑎᑯᓪᓗ ᑎᒥᖓ ᓴᒃᑯᐃᕗᑦ ᐃᓱᒪᓕᐊᒥᓂᕐᒥᓂᒃ ᓄᐊᔅᕕᔅᑎᐅᓪ ᕿᒥᕐᕈᔭᐅᓂᖓᓂᒃ

Posted on: 18-December-2013

ᑎᓰᕝᕙ 18-ᖑᑎᓪᓗᒍ, ᑲᓇᑕᒥ ᑐᓴᐅᒪᖃᑎᒌᓐᓂᕐᒧᑦ ᓈᓚᐅᑎᒃᑯᑦ ᐅᖄᓚᐅᑎᑯᓪᓗ ᑎᒥᖓ ᓴᒃᑯᐃᓚᐅᖅᑐᑦ ᐃᓱᒪᓕᐊᒥᓂᕐᒥᓂᒃ ᕿᒥᕐᕈᔭᐅᓂᖓᓂᒃ ᓄᐊᔅᕕᔅᑎᐅᓪᒃᑯᑦ. ᐊᕐᕌᓂ, ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐅᖃᕈᓐᓇᓚᐅᖅᑐᑦ ᑖᒃᑯᓂᖓ ᑎᒥᐅᔪᒧᑦ ᑎᑎᕋᖅᑐᑎᑦ ᐃᓄᒃᑎᒍᓪᓗ. ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᕿᒥᕐᕈᓚᐅᖅᐳᑦ ᑎᒥᐅᔫᑉ ᐃᓱᒪᓕᐊᖓᓂᒃ ᐊᒻᒪᓗ ᑕᒪᐃᓐᓂᑦ ᑲᔪᖏᖅᓴᐃᒍᑎᐅᕗᑦ ᐃᓗᓕᖏᑦ ᐃᓚᖏᑦ ᐃᓱᒪᓕᐅᕈᑕᐅᓚᐅᖅᑐᑦ ᓄᓇᕗᒥᐅᑕᕐᓄᑦ ᐃᑭᐊᖅᑭᔾᔪᑎᓂᒃ ᐊᑐᖅᐸᑦᑐᓄᑦ:

  1. ᐃᓕᓴᖅᓯᓪᓗᑎᑦ ᓄᑖᕈᕆᐊᖅᑕᐅᓂᒃᓴᖏᑕ ᐸᕐᓇᐅᑎᖏᑦ ᐱᐅᓯᕚᓪᓕᖅᑎᑦᑎᔾᔮᙱᒻᒪᑕ ᐃᑭᐊᖅᑭᔾᔪᑎᓕᕆᓂᕐᒧᑦ ᐱᔨᑦᑎᕋᕐᓂᖏᑦ ᓄᓇᕗᒥᐅᑕᕐᓄᑦ ᐊᑐᖅᐸᑦᑐᓄᑦ ᐃᑭᐊᖅᑭᔾᔪᑎᓂᑦ:

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ ᐃᒪᓐᓇ ᐅᖃᓚᐅᖅᑐᑦ:

ᐱᓗᐊᖅᑐᒥᒃ ᓱᑲᑦᑐᒃᑯᑦ ᐃᑭᐊᖅᑭᔾᔪᑏᑦ, ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ ᐅᒡᒍᐊᖅᑐᖅ ᐅᖃᓕᒫᓚᐅᕐᒪᑕ ᐸᕐᓇᐅᑎᒋᔭᐅᔪᖅ ᐱᐅᓯᕚᓪᓕᖅᓯᒪᓂᐊᕐᓂᕋᙱᑦᑐᑦ ᓄᓇᕗᒧᑦ. ᑭᓯᐊᓂᓕ, ᓄᐊᔅᕕᔅᑎᐅᓪᒃᑯᑦ ᖁᑦᑎᙱᓗᐊᖅᑐᒥᒃ ᓴᖅᑮᓇᓱᒃᐳᑦ, ᐱᐅᓯᕚᓪᓕᖅᑎᑦᑎᑐᐃᓐᓇᕋᓱᒃᑐᑎᑦ ᓄᓇᒦᑦᑐᑦ ᐃᑭᐊᖅᑭᔾᔪᑎᓂᑦ ᓄᓇᓕᓐᓄᑦ ᐱᐅᓂᖅᓴᓂᒃ ᐱᔨᑦᑎᖅᑕᐅᔭᕇᖅᑐᑦ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐃᑭᐊᖅᑭᔾᔪᑎᓂᑦ ᐊᑐᖅᐸᑦᑐᓂᑦ.

ᑎᒥᐅᔪᖅ ᐃᓱᒪᓕᐅᓚᐅᖅᑐᑦ ᐃᒪᓐᓇ:

...ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐱᔨᑦᑎᖅᑕᐅᕙᒃᑐᑦ ᓄᓇᓖᑦ ᑭᖑᕙᓯᓗᐊᖏᓐᓇᙳᓱᑦᑐᑦ ᑕᐃᒃᑯᓇᙵᑦ ᓄᓇᒦᑦᑐᓂᑦ ᐃᑭᐊᖅᑭᔾᔪᑎᓂᑦ ᐊᑐᖅᐸᑦᑐᓂᑦ ᓄᓇᓕᖏᓐᓂᑦ ᐅᑯᑎᒎᓇ: ᐊᑐᐃᓐᓇᐅᒪᓂᖏᓐᓂᑦ ᐱᐅᔫᓂᖏᓐᓂᓪᓗ, ᐱᓗᐊᖅᑐᒥᒃ ᐃᑭᐊᖅᑭᔾᔪᑎᓄᑦ ᓯᕗᓂᒃᓴᒥᓗ ᑐᓴᐅᒪᖃᑎᒌᓐᓂᕐᒧᑦ ᐱᔨᑦᑎᕋᕈᑎᓄᑦ

  1. ᐃᓕᓴᖅᓯᓪᓗᑎᑦ ᐋᖅᑭᒃᑕᐅᔭᕆᐊᖃᕐᓂᖏᓐᓂᒃ ᐊᑯᓂᐅᔪᒧᑦ ᐊᑐᕋᒃᓴᓂᑦ ᐊᐅᓚᒍᑎᓂᑦ ᐃᑲᔪᖅᑐᖅᑕᐅᖁᓪᓗᒋᑦ ᑐᓴᐅᒪᖃᑎᒌᒍᑎᓕᕆᓂᕐᒧᑦ ᐱᔨᑦᑎᕋᕈᑎᖏᑦ ᖁᒻᒧᐊᑦᑎᑕᐅᓯᒪᔪᓄᑦ ᐊᑐᖅᐸᑦᑐᑦ ᐃᑭᐊᖅᑭᔾᔪᑎᓂᑦ ᓄᓇᓕᓐᓂ

ᐅᐊᑦᑎᐊᕈ, ᑎᒥᐅᔪᑉ ᐃᓱᒪᒋᔭᖃᓚᐅᖅᓯᒪᔪᑦ ᐃᒪᓐᓇ

ᑎᒥᐅᔪᖅ ᐃᓱᒪᒋᔭᖃᖅᑐᖅ ᓴᖅᑭᑕᐅᓂᖏᑦ ᐃᑭᐊᖅᑭᔾᔪᑎᓕᕆᔾᔪᑏᑦ ᐱᔨᑦᑎᕋᖅᑕᐅᓂᖏᑦ ᓄᑭᓪᓚᐅᑏᑦ, ᐱᖃᓯᐅᑎᓪᓗᒋᑦ ᐅᖓᓯᑦᑐᒥᒃ ᐃᓄᖃᑦᑎᐊᙱᑦᑐᓂᓗ ᓄᓇᓖᑦ, ᐊᑐᖃᑦᑕᕆᐊᖃᖅᐳᑦ ᒪᓕᑦᑐᒋᑦ ᐊᑭᖏᑦ ᐃᑭᐊᖅᑭᔾᔪᑏᑦ ᐊᒻᒪᓗ ᒐᕙᒪᒃᑯᓐᓂᑦ ᑮᓇᐅᔭᖅᑖᕆᔭᐅᕙᒃᑐᑦ ᐊᑐᖅᑕᐅᔪᑦ ᒪᓕᓪᓗᒋᑦ, ᑲᔪᖏᖅᓴᐃᔪᖅ ᑕᒪᓐᓇ ᓇᒻᒥᓂᖁᑎᓖᑦ ᐃᓄᓐᓂᑦ ᑭᒃᑯᑐᐃᓐᓇᕐᓂᑦ ᐱᓕᕆᖃᑎᒌᒍᓐᓇᕐᓂᐊᕐᓂᖏᓐᓂᒃ ᓴᖅᑮᓂᐊᕐᒪᑦ. ᑕᐃᒪᐃᓐᓂᖓᓄᑦ, ᑎᒥᐅᔪᖅ ᐃᓱᒪᑖᖅᑐᑦ ᓈᒻᒪᒃᑲᔭᙱᒻᒪᑦ ᒫᓐᓇᐅᔪᖅ ᐋᖅᑮᔪᖃᕈᓂ ᑮᓇᐅᔭᖅᑖᕈᓯᕐᓂᑦ ᐃᑲᔫᓯᐊᖃᑦᑕᕋᔭᖅᑐᑦ ᓴᖅᑭᑕᐅᓂᖏᑦ ᐃᑭᐊᖅᑭᔾᔪᑎᖃᕈᓐᓇᓂᕐᒧᑦ ᐱᔨᑦᑎᕋᖅᑐᖃᕐᓗᓂ.

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ ᐃᒪᓐᓇ ᐅᖃᓚᐅᖅᑐᑦ:

ᐅᓪᓗᒥᐅᔪᖅ ᑐᓴᐅᒪᖃᑎᒌᑦᑐᓕᕆᕙᒃᑐᑦ ᓈᒻᒪᑦᑐᒥᒃ ᐊᑐᐃᓐᓇᐅᒪᑎᑦᑎᙱᑦᑐᑦ ᐊᓯᔾᔨᖅᐸᓪᓕᐊᔪᓂᑦ ᑭᙴᒪᒋᔭᕐᓂᑦ ᒪᓕᙱᑦᑎᐊᖅᑐᓂᑦ ᐊᑐᖅᑕᐅᒍᒪᔪᓂᓪᓗ ᐅᑭᐅᖅᑕᖅᑐᒥᐅᑕᓄᑦ ᐃᑭᐊᖅᑭᔾᔪᑎᓂᑦ ᐊᑐᖅᐸᑦᑐᓂᑦ ᐊᒻᒪᓗ ᐊᓯᔾᔨᖅᐹᓪᓕᖅᑐᖃᙱᑉᐸᑦ, ᐃᑭᐊᖅᑭᔾᔪᑎᓕᕆᓂᖅ ᐅᑭᐅᖅᑕᖅᑐᒥ ᐊᒻᒪᓗ ᐅᑭᐅᖅᑕᖅᑐᒥ ᑲᓇᑕᑉ ᓂᒋᐊᓂᓗ ᐊᖏᓪᓕᕙᓪᓕᐊᑐᐃᓐᓇᕐᓂᐊᖅᑐᖅ ᑕᒪᓐᓇ ᐊᕕᒃᓯᒪᓂᕆᔭᖓ.

[ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ] ᑲᔪᖏᖅᓴᐃᔪᒻᒪᕆᐅᕗᑦ ᑎᒥᐅᔪᒥᑦ ᐃᓕᓴᖅᓯᓗᑎᑦ ᐃᑭᐊᖅᑭᔾᔪᑏᑦ ᓄᑭᓪᓚᐅᑏᑦ ᐱᔨᑦᑎᕋᕈᒋᔭᐅᓪᓚᕆᒋᐊᖃᕐᒪᑦ ᐊᒻᒪᓗ ᐋᖅᑭᒋᐊᖅᓯᓗᑎᑦ ᒪᓕᒐᕋᓛᖏᓐᓂᒃ ᐊᒻᒪᓗ ᑮᓇᐅᔭᖃᖅᑎᑦᑎᓂᕐᒧᑦ ᑐᙵᕕᖏᓐᓂᑦ ᑐᓴᐅᒪᖃᑎᒌᓐᓂᕐᒧᑦ ᐱᔨᑦᑎᕋᕐᓂᕐᒥᒃ ᐅᑭᐅᖅᑕᖅᑐᒥ ᐃᑲᔪᖅᑐᖅᑕᐅᖁᓪᓗᒋᑦ ᐊᑐᐃᓐᓇᐅᒪᓂᕆᔪᓐᓇᖅᑕᖏᑦ ᐊᑭᑐᓗᐊᙱᑦᑑᓗᒋᓪᓗ ᐃᑭᐊᖅᑭᔾᔪᑎᓂᑦ ᐊᑐᕈᓐᓇᕐᓂᖏᑦ ᑕᒪᐃᓐᓂᑦ ᐅᑭᐅᖅᑕᖅᑐᑉ ᓄᓇᓕᖏᓐᓂᑦ, ᐱᖃᓯᐅᑎᓗᒍ ᐅᖄᓚᐅᑎᒃᑰᖓᔪᑦ.

ᑎᒥᐅᔪᖅ ᐃᓱᒪᓕᐊᕆᓚᐅᖅᑕᖏᑦ:

ᑐᓴᐅᒪᖃᑦᑕᐅᑎᔪᓕᕆᓂᕐᒧᑦ ᑎᒥᖓ ᐃᓱᒪᒋᔭᖃᕐᒪᑦ ᐱᖁᑎᕐᔪᐊᑦ ᐅᑭᐅᖅᑕᖅᑐᒥ ᐃᖏᕐᕋᔪᓕᕆᓂᕐᒧᑦ, ᐱᓗᐊᖅᑐᒥᒃ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐊᑐᓲᑦ ᓄᓇᓖᑦ, ᑲᒪᒋᔭᐅᔭᕆᐊᖃᕐᒪᑦ. ᑎᒥᐅᔪᖅ ᐃᓱᒪᒋᔭᖃᕆᕗᖅ, ᐱᓕᕆᒋᐊᙱᒃᑯᑎᑦ, ᖃᕋᓴᐅᔭᓕᕆᓂᕐᒧᑦ ᐊᕕᑦᑐᖅᓯᒪᓂᖏᑦ ᓄᐊᔅᕕᔅᑎᐅᓪᒃᑯᓐᓂᑦ (ᓲᕐᓗ ᓄᓇᒃᑯᑎᒍᑦ ᐃᑭᐊᖅᑭᔾᔪᑎᓂᑦ ᐊᑐᐃᓐᓇᐅᒪᑎᑦᑎᓂᖏᑦ ᐊᒻᒪᓗ ᖁᒻᒧᐊᑦᑎᑕᐅᓯᒪᔪᖅᑎᒎᖓᔪᖏᑦ) ᐋᖅᑭᒃᑕᐅᔾᔮᙱᒻᒪᑕ.

ᑐᓴᐅᒪᖃᑦᑕᐅᑎᔪᓕᕆᓂᕐᒧᑦ ᑎᒥᖓ ᐅᖃᒃᑲᓐᓂᖅᓯᒪᕗᖅ “ᐋᖅᑮᓇᓱᐊᓛᕆᐊᖓᓂᒃ ᐊᐅᓚᒍᑎᓂᑦ ᑮᓇᐅᔭᖃᖅᑎᑕᐅᖁᓪᓗᒋᑦ ᐱᖁᑎᕐᔪᐊᓄᑦ ᐃᖏᕐᕋᔪᓕᕆᓂᕐᒨᖓᔪᑦ ᓄᐊᔅᕕᔅᑎᐅᓪᒃᑯᑦ ᐊᐅᓚᓂᖃᕐᕕᒋᔭᖏᓐᓂᑦ.”

  1. ᐃᓕᓴᖅᓯᓗᓂ ᐊᒥᓱᕈᖅᐸᓪᓕᐊᔪᑦ ᐊᑐᕈᒪᔪᑦ ᐅᖄᓚᐅᑎᕋᓛᕐᓄᑦ ᐊᒻᒪᓗ ᐊᑐᕋᒃᓴᐅᔾᔪᑎᖏᑦ ᐅᖄᓚᐅᑎᕋᓛᖅ ᐱᔪᓐᓇᖁᓪᓗᒍ:

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ ᐃᒪᓐᓇ ᐅᖃᓚᐅᖅᑐᑦ:

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ ᐃᓕᓴᖅᓯᕗᖅ ᓄᓇᕘᒥ ᐅᖄᓚᐅᑎᕋᓛᓕᕆᓂᕐᒧᑦ ᐱᔨᑦᑎᖅᑕᐅᔪᒪᔪᑦ ᐊᒥᓱᕈᖅᐸᓪᓕᐊᑐᐃᓐᓇᕐᓂᖓᓂᒃ. ᐅᓪᓗᒥᐅᔪᖅ, ᓄᓇᕗᑦ ᐊᒥᓱᒻᒪᕆᐊᓗᓐᓂᑦ ᐊᕐᕌᒍᓂᑦ ᑭᖑᕙᓯᒻᒪᑦ. ᑲᓇᑕᓕ 4G ᐅᖄᓚᐅᑎᕋᓛᖅᑎᒍᑦ ᐱᔨᑦᑎᖅᑕᐅᔪᓐᓇᖅᑎᓪᓗᒍ (ᐊᒻᒪᓗ 5G ᐊᑐᖅᑕᐅᖃᑦᑕᓛᕐᓂᖓᓂᒃ ᐅᖃᐅᑕᐅᓯᒪᓪᓗᓂ ᓄᓇᕐᔪᐊᕐᒥ), ᖃᑦᑏᓐᓇᑯᓗᐃᑦ ᓄᓇᕘᒥ ᓄᓇᓕᖏᑦ 2G ᐱᔨᑦᑎᖅᑕᐅᖃᑦᑕᖅᑐᑦ. ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ ᐃᓱᒫᓗᒃᑐᑦ 3G ᐅᖄᓚᐅᑎᕋᓛᖅᑎᒍᑦ ᐱᔨᑦᑎᕋᖅᑕᐅᒍᓐᓇᕋᔭᕐᓂᖏᑦ ᓄᓇᕗᒥ ᐸᕐᓇᐅᑎᖏᓐᓂᑦ ᐱᑐᖃᐅᓗᐊᓕᕋᔭᖅᑐᑦ ᐋᖅᑭᒃᑕᐅᒐᓗᐊᕈᑎᑦ ᐊᒻᒪᓗ ᓄᓇᕘᒥ ᓄᓇᓕᖏᑦ ᑭᖑᕙᓯᓗᐊᒃᑲᓐᓂᑐᐃᓐᓇᕋᔭᖅᑐᑎᑦ.

ᑐᓴᐅᒪᖃᑦᑕᐅᑎᔪᓕᕆᓂᕐᒧᑦ ᑎᒥᖓ ᐃᓱᒪᓕᐊᒥᓂᖓ:

ᑐᓴᐅᒪᖃᑦᑕᐅᑎᔪᓕᕿᓂᕐᒧᑦ ᑎᒥᖓ ᐃᓱᒪᓕᐅᓚᐅᖅᑐᑦ ᑕᐅᑐᓐᓂᖃᖅᑐᑎᑦ ᐱᓇᓱᐊᖅᑕᐅᔪᑦ ᐊᔾᔨᒌᙱᑦᑐᑦ ᑎᑭᑕᐅᓇᓱᓐᓂᖏᓐᓂᑦ, ᐱᐅᓯᕚᓪᓕᖅᓯᒪᔪᓂᑦ ᐃᑭᐊᖅᑭᔾᔪᑎᓂᑦ ᐱᔨᑦᑎᕋᖅᑐᖃᕐᓗᓂ ᐊᒻᒪᓗ ᐊᑐᐃᓐᓇᐅᒪᒋᐊᕐᔫᒥᑎᑕᐅᓗᑎᑦ ᐅᖄᓚᐅᑎᕋᓛᑦ ᐱᔨᑦᑎᖅᑕᐅᓂᖏᑦ ᐱᐅᓂᖅᓴᐅᓗᑎᑦ, ᐅᑭᐅᖅᑕᖅᑐᒥᐅᑦ ᑲᓇᑕᒥ ᑐᓴᐅᒪᖃᑎᒌᒍᑎᓂᑦ ᐱᔨᑦᑎᖅᑕᐅᔪᓐᓇᕐᓂᐊᕐᒪᑕ ᐊᔾᔨᖃᐸᓗᒃᑐᓂᑦ ᐊᓯᖏᓐᓄᑦ ᑲᓇᑕᒥᐅᑕᕐᓄᑦ.

  1. ᐃᓕᓴᖅᓯᓪᓗᑎᑦ ᑭᙴᒪᒋᔭᐅᔪᑦ ᑲᒪᒋᔭᐅᓗᑎᑦ ᐊᐅᓪᓚᖅᑎᑕᐅᓂᖏᑕ ᐊᑭᖏᑦ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐃᑭᐊᖅᑭᔾᔪᑎᓂᑦ ᐱᔨᑦᑎᖅᑕᐅᕙᒃᑐᑦ ᓄᓇᓕᓐᓄᑦ:

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ ᐃᒪᓐᓇ ᐅᖃᓚᐅᖅᑐᑦ:

ᖃᕋᓴᐅᔭᓕᕆᔾᔪᑏᑦ ᖃᓄᐃᑦᑐᑐᐃᓐᓇᐃᑦ, ᐊᑐᐃᓐᓇᐅᒪᑎᑦᑎᓲᑦ ᐱᔨᑦᑎᕋᖅᑏᓪᓘᓐᓃᑦ ᑕᒪᐃᓐᓂᑦ ᓄᓇᕗᒥ ᑭᙴᒪᒋᔭᖏᓐᓂᒃ ᐊᑐᐃᓐᓇᐅᒪᑎᑦᑎᒍᓐᓇᔾᔮᙱᑦᑐᑦ, ᐅᕝᕙᓘᓐᓃᑦ ᐅᑭᐅᖅᑕᖅᑐᑉ ᑭᙴᒪᒋᔭᓕᒫᖏᓐᓂᒃ ᐊᑐᐃᓐᓇᐅᒪᑎᑦᑎᓚᐅᖅᓯᒪᒍᓐᓇᔾᔮᙱᑦᑐᑦ.

[ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ] ᐊᑐᖅᐸᑦᑐᑦ ᐱᐅᓛᕐᓂᑦ ᖃᕋᓴᐅᔭᓕᕆᓂᕐᒧᑦ ᑐᙵᕕᖏᓐᓂᒃ ᐱᐅᓛᕐᒥᑦ ᓄᓇᒥ ᐊᒻᒪᓗ ᑲᔪᖏᖅᓴᐃᓲᖑᓪᓗᑎᑦ ᐊᑭᑦᑐᕋᐅᑎᓂᕐᒥᒃ ᐊᒻᒪᓗ ᖃᓄᖅᑑᕋᓱᐊᖅᑎᑦᑎᓲᖑᓪᓗᑎᑦ ᓄᓇᓕᒻᒧᑦ ᐅᐃᒍᖃᕐᕕᖏᓐᓂᑦ ᐃᑭᐊᖅᑭᔾᔪᑎᓂᑦ ᐊᑐᕐᓗᑎᑦ.

ᐃᓚᒋᓪᓗᓂᐅᒃ ᐃᓱᒪᓕᐊᒥᓂᖏᑕ, ᑐᓴᐅᒪᖃᑦᑕᐅᑎᔪᓕᕆᓂᕐᒧᑦ ᑎᒥᖓ ᓴᖅᑮᓂᐊᕐᓂᕋᖅᓯᒪᔪᑦ ᖃᐅᔨᓴᕐᓂᕐᒥᒃ 2014−ᖑᓕᖅᐸᑦ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐱᔨᑦᑎᕋᖅᑕᐅᓲᕐᓂᑦ ᑲᓇᑕᒥ.

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ ᓂᕆᐅᑦᑎᐊᖅᑐᑦ ᐃᓚᐅᖃᑕᐅᖃᑦᑕᕐᓂᐊᕐᒪᑕ ᖃᐅᔨᓴᖅᑕᐅᔪᓂᑦ ᑲᑎᒪᔾᔪᑎᒋᔭᐅᔪᓂᓪᓗ ᓯᕗᒧᐊᑦᑎᑦᑎᑦᑎᐊᕈᒪᓪᓗᑎᑦ ᓄᓇᕗᒥ ᐊᑐᖅᐸᑦᑐᑦ ᐃᑭᐊᖅᑭᔾᔪᑎᓂᑦ ᐱᔪᒪᔭᖏᓐᓂᑦ ᑐᓴᐅᒪᔭᐅᑦᑎᐊᕈᓐᓇᕐᓂᐊᕐᒪᑕ.