ᐱᓕᕆᐊᑦ

ᐱᔨᑦᑎᖅᑕᐅᑦᑎᐊᕋᓗᐊᖅᐲᑦ ᒪᓕᑦᑐᒍ ᐊᑭᓕᖅᓱᕐᓂᕆᔭᐃᑦ? ᐱᔨᑦᑎᖅᑕᐅᓂᕆᔭᐃᑦ ᖃᓄᑎᒋ ᐊᔾᔨᖃᖅᑎᒋᕙ ᓄᓇᕗᒥᐅᑦ ᐊᓯᖏᑦ ᐱᔨᑦᑎᖅᑕᐅᔪᑦ ᒪᓕᑦᑐᒋᑦ? ᑲᓇᑕᒥ ᓄᓇᕐᔪᐊᕐᒥᓘᓐᓃᑦ ᐱᔨᑦᑎᖅᑕᐅᓂᖏᑕ ᓇᓕᒧᓐᓂᖏᑦ ᐊᔾᔨᖃᖅᑎᒋᕙ ᖃᓄᑎᒋ ᐱᔨᑦᑎᖅᑕᐅᓃᑦ? ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ ᖃᐅᔨᔪᒪᕗᑦ.

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ ᓚᐃᓴᓐᓯᑖᖅᓯᒪᕗᑦ ᐊᔾᔨᖏᓐᓂᒃ ᖃᕋᓴᐅᔭᕐᓄᑦ ᐊᑐᖅᑕᐅᓗᐊᓲᑦ ᐊᒻᒪᓗ ᐱᑦᑎᐊᖅᓯᒪᓛᑦ ᐃᑭᐊᖅᑭᔾᔪᑏᑦ ᓱᑲᓐᓂᖏᑕ ᖃᐅᔨᓴᖅᑕᐅᓂᖓᓄᑦ ᐃᑭᐊᖅᑭᕕᖓᓂ ᐃᑭᐊᖅᑭᔾᔪᑎᑎᒍᑦ. ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓ ᐃᑭᐊᖅᑭᔾᔪᑏᑦ ᓱᑲᓐᓂᖏᑕ ᖃᐅᔨᓴᖅᑕᐅᓂᖓᓄᑦ ᐃᓛᒃᑰᖓᔪᒃᑯᑦ ᐃᑭᐊᖅᑭᔾᔪᑎᑎᒎᖓᕗᖅ, ᐱᔨᑦᑎᕋᖅᑎᐅᔪᑎᒎᖓᙱᑦᑐᖅ ᐊᑐᖅᑕᐅᕙᑦᑐᓂᑦ ᓄᓇᕗᒥ, ᑕᐃᒪᐃᒻᒪᑦ ᐱᑦᑎᐊᖅᓯᒪᔪᓂᑦ ᐊᒻᒪᓗ ᑐᑭᓯᒋᐊᕈᑏᑦ ᑐᑭᓯᔭᐅᖁᓪᓗᒋᑦ ᐃᓛᒃᑰᖓᔪᒃᑯᑦ ᐱᔨᑦᑎᖅᑕᐅᓂᖏᑕ ᐃᑭᐊᖅᑭᔾᔪᑎᑎᒍᑦ ᓱᑲᓐᓂᖏᑦ ᓄᓇᕗᒥᐅᑦ ᐊᑐᖅᐸᑦᑐᑦ ᖃᐅᔨᔭᐅᑦᑎᐊᖁᓪᓗᒋᑦ.

ᐆᑦᑐᕈᒃ ᓱᑲᓐᓂᖓᑕ ᐃᑭᐊᖅᑭᔾᔪᑎᕕᑦ ᖃᐅᔨᓴᖅᑕᐅᓂᖓ . ᓱᑲᓐᓂᖓ ᐃᑭᐊᖅᑭᔾᔪᑎᕕᑦ ᖃᐅᔨᒋᐊᕈᒃ, ᖃᐅᔨᒋᐊᖃᑦᑕᕐᓗᒍᓗ, ᐊᒻᒪᓗ ᐃᑲᔪᕋᔭᖅᑐᑎᑦ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᑎᒥᖓᑕ ᑎᑎᕋᕐᓗᑎᑦ ᐱᔨᑦᑎᖅᑕᐅᓂᕆᔭᖏᑕ ᓄᓇᕗᒥᐅᑦ ᓇᓕᒧᓐᓂᖏᓐᓂᒃ ᐃᑭᐊᖅᑭᔾᔪᑎᓂᑦ ᐊᑐᖅᐸᑦᑐᓂᑦ. ᑐᑭᓯᒋᐊᕈᑎᐅᔪᑦ ᐊᑐᖅᑕᐅᒐᔭᖅᐳᑦ ᐊᐃᕙᐅᑎᖃᖅᑎᓪᓗᒋᑦ ᐊᒥᓱᕈᖅᐸᓪᓕᐊᒻᒪᑕ ᓄᓇᕗᒥ ᐊᑐᖅᐸᑦᑐᑦ ᖃᕋᓴᐅᔭᖅᑎᒍᑦ ᐃᑭᐊᖅᑭᔾᔪᑎᓂᑦ ᐊᔾᔨᐅᙱᓗᐊᖅᑎᑕᐅᕙᒻᒪᑕ ᐊᒻᒪᓗ ᐊᔭᐅᕆᓗᑎᑦ ᑮᓇᐅᔭᓂᑦ ᐊᑐᕆᐊᕐᔫᒥᔪᖃᕆᐊᖃᕐᓂᖓᓂᒃ ᐃᑭᐊᖅᑭᔾᔪᑎᓕᕆᓂᕐᒧᑦ ᐱᔨᑦᑎᖅᑕᐅᑦᑎᐊᓂᖅᓴᐅᔭᕆᐊᖃᖅᑐᑎᓪᓗ ᓄᓇᕗᒥᐅᑕᐅᔪᑦ.

ᒪᓕᑦᑐᒋᑦ 500−ᐸᓘᔪᑦ ᖃᐅᔨᓵᒥᓃᑦ ᑕᒪᐃᓐᓂᓕᒫᑲᓴᒃ ᓄᓇᓕᓐᓂ ᓄᓇᕗᒥ, ᖃᕋᓴᐅᔭᖅᑎᒍᑦ ᐊᑐᖅᑕᐅᒋᐊᙵᓲᑦ ᓱᑲᓐᓂᖏᑦ 1.672 Mbps−ᖑᕗᑦ ᐊᒻᒪᓗ ᐊᑐᖅᑕᐅᒋᐊᙵᓲᑦ ᖃᕋᓴᐅᔭᒃᑯᑦ ᐱᓇᓱᓪᓗᓂ ᑐᑭᓯᒋᐊᕈᑎᓂᑦ 397 kbps−ᖑᕗᑦ. ᑲᓇᑕᒥᐅᑕᐃᑦ ᐊᓯᖏᑦ ᐊᔾᔨᒋᙱᑎᐊᖅᑎᓪᓗᓂᒋᑦ: 30.77 Mbps ᖃᕋᓴᐅᔭᒃᑯᑦ ᐱᔭᐅᔪᑦ ᑐᑭᓯᒋᐊᕈᑏᑦ, 7.46 Mbps ᓴᖅᑮᓇᓱᐊᕐᓗᓂ ᖃᕋᓴᐅᔭᒃᑯᑦ ᓱᑲᓐᓂᖓ (ᒪᓕᑦᑐᒋᑦ ᐆᒃᓚᑉ ᓇᓗᓇᐃᒃᑯᑕᖏᑦ ᑐᑭᓯᒋᐊᕈᑏᑦ ᔪᓚᐃ 2015-ᒧᑦ).