Projects
ᐃᒡᓗᕈᓯᕐᒥ ᑲᓱᖅᑎᑕᐅᓗᑎᑦ ᐃᓕᓐᓂᐊᖅᑐᑦ ᐆᑦᑐᕋᖅᑕᐅᓪᓗᓂ ᐱᓕᕆᐊᖅ

ᐃᓕᓐᓂᐊᕐᕕᒻᒥ ᑲᓱᖅᑎᑕᐅᓪᓗᑎᑦ ᐃᓕᓐᓂᐊᖅᑐᑦ ᐆᑦᑐᕋᖅᑕᐅᓪᓗᓂ ᐱᓕᕆᐊᖅ ᐱᒋᐊᖅᑎᑕᐅᓚᐅᖅᓯᒪᕗᖅ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᓯᕗᒧᐊᑦᑎᑦᑎᒋᐊᖅᑐᑎᑦ ᑲᓱᖅᑕᕈᑏᑦ ᐱᐅᓯᕚᓪᓕᖅᓯᒪᔪᑦ ᓄᓇᕘᓕᒫᕐᒥ ᐃᓕᓐᓂᐊᕐᕕᖏᓐᓄᑦ ᐊᑐᖅᑕᐅᖃᑦᑕᕐᓂᐊᕐᒪᑕ.  ᐆᑦᑐᕋᓚᐅᖅᓯᒪᕗᑦ ᐱᖃᑕᐅᓪᓗᑎᑦ ᐱᖓᓲᔪᖅᑐᑦ ᐃᓕᓐᓂᐊᕐᕖᑦ. ᒪᕐᕉᒃ ᐊᑐᓂᑦ ᐱᖓᓱᑦ ᓄᓇᕗᒥ ᐊᕕᑦᑐᖅᓯᒪᔪᖁᑎᖏᓐᓂᑦ, ᓂᕈᐊᖅᑕᐅᓪᓗᑎᑦ ᑖᒃᑯᐊ ᖃᐅᔨᒋᐊᕐᕕᖃᖅᑳᓚᐅᖅᑐᑎᑦ ᐃᓕᓐᓂᐊᕐᓂᓕᕆᔨᒃᑯᓐᓂᑦ.  ᐊᑐᓂᑦ ᐃᓕᓐᓂᐊᕐᕕᒃ ᕿᓂᖅ ᐃᑭᐊᖅᑭᔾᔪᑎᓕᕆᔾᔪᑎᒥᒃ ᐱᓚᐅᖅᓯᒪᔪᑦ ᐱᔨᑦᑎᕋᕈᑎᖓ ᐋᖅᑭᒃᑕᐅᓪᓗᓂ ᐊᑐᖅᑕᐅᓂᐊᕋᓱᒋᔭᐅᔪᑦ ᒪᓕᑦᑐᒋᑦ (2Mbps ᓱᑲᓐᓂᖓ ᐃᑭᐊᖅᑭᔾᔪᑎ, 512kbps ᐃᑭᐊᖅᑭᕕᒻᒨᖅᑎᑦᑎᔪᓐᓇᕐᓂᖏᑦ ᓱᑲᓐᓂᖓ) ᐊᒻᒪᓗ ᓄᑭᓪᓚᐅᑎᖏᑦ ᖃᕋᓴᐅᔭᐃᓪᓗ ᑲᓱᖅᓯᒪᖁᓪᓗᒋᑦ ᖃᕋᓴᐅᔭᖏᓐᓄᑦ ᐃᑭᐊᖅᑭᔾᔪᑎᒧᑦ ᑲᓱᖅᑕᕈᑎᖓᓅᖅᑕᐅᓪᓗᑎᑦ.  ᐆᑦᑐᕋᐅᑎ ᐱᓕᕆᐊᖅ ᐱᓕᕆᔾᔪᑏᑦ ᐃᓕᓐᓂᐊᖅᑎᓄᑐᐊᖅ ᐊᑐᕋᒃᓴᐅᓚᐅᖅᑐᑦ ᐊᒻᒪᓗ ᐃᓛᒃᑰᖓᓪᓗᑎᑦ ᐃᓕᓐᓂᐊᕐᕕᒻᒥ ᐃᑭᐊᖅᑭᔾᔪᑎᖏᓐᓄᑦ ᖃᕋᓴᐅᔭᖏᓐᓄᓪᓗ ᐃᖅᑲᓇᐃᔭᖅᑎᓄᑦ ᐊᑐᖅᑕᐅᓲᓄᑦ − ᒪᓕᑦᑕᐅᔭᕆᐊᖃᕐᓂᕋᓚᐅᖅᑖᖅ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓᑕ ᖃᐅᔨᒪᓇᑦᑎᐊᖁᓪᓗᒍ ᑲᓱᖅᓯᒪᓂᖏᑦ ᓯᕗᓪᓕᖅᐹᕐᒥ ᐊᑐᐃᓐᓇᐅᒪᖅᑳᕆᐊᖃᕐᒪᑕ ᐃᓕᓐᓂᐊᖅᑎᓄᑦ.

ᐆᑦᑐᕋᐅᑎ ᐱᓕᕆᐊᖅ ᐱᒋᐊᖅᑎᑕᐅᓚᐅᖅᓯᒪᕗᖅ ᔮᓐᓄᐊᕆ 2010-ᖑᑎᓪᓗᒍ ᐊᒻᒪᓗ ᐃᓱᓕᑦᑎᑦᑐᓂ ᒫᑦᓯ 31, 2010−ᒥ.  ᐃᓚᐅᖃᑕᐅᓚᐅᖅᑐᑦ ᐃᓕᓐᓂᐊᕐᕖᑦ ᑭᐅᔾᔪᑎᖏᑦ ᐱᐅᔪᕐᔪᐊᒻᒪᕆᐅᓚᐅᖅᑐᑦ ᑲᒪᓇᒻᒪᕆᑦᑐᑎᑦ ᐊᒻᒪᓗ ᐆᑦᑐᕋᖅᑕᐅᔪᖅ ᐊᑯᓂᐅᓂᖅᓴᖅ ᐱᓕᕆᐊᖑᒃᑲᓐᓂᒻᒪᕆᓕᖅᑐᓂ ᐃᓱᓕᑦᑎᑦᑐᒍ 2010 ᐃᓕᓐᓂᐊᕐᓇᑉ ᐊᕐᕌᒍᖓᓄᑦ.

ᐃᓕᓴᐃᔩᑦ ᐅᖃᐅᓯᒥᓂᖏᑦ ᐱᓕᕆᐊᑉ ᐱᓪᓗᒍ:

ᐊᓯᖏᓐᓄᑦ ᐃᓕᓴᐃᔨᓄᑦ ᐅᖃᐅᓯᖃᕈᓐᓇᖏᑦᑐᖓ, ᑭᓯᐊᓂᓕ ᐅᕙᒻᓄᑦ ᐊᑦᑐᐃᓂᖃᕕᔾᔪᐊᖅᓯᒪᒻᒪᑦ ᐃᓕᓴᕕᒻᒥ ᐃᓕᓐᓂᐊᖅᑎᑦᑎᑎᓪᓗᖓ, ᖃᐅᔨᓴᕐᓂᒧᑦ ᐊᒻᒪᓗ ᐱᕙᓪᓕᐊᔪᓂᑦ ᐃᓕᓐᓂᖅᑎᑎᓪᓗᖓ.  ᐆᑦᑑᑎᒋᓗᒍ ᐃᓕᓐᓂᐊᖅᑎᑦᑎᕋᑖᓚᐅᕋᒪ ᐊᐅᑉ ᐃᖏᕐᕋᓂᖓ ᑎᒥᒥ ᖃᐅᔨᓴᕐᓂᕐᒥᒃ ᐊᒻᒪᓗ ᐱᐅᔪᒻᒪᕆᐊᓘᓚᐅᖅᑐᖅ ᑕᕐᕆᔮᒃᓴᓂᑦ ᐊᑐᐃᓐᓇᐅᒪᑎᓪᓗᒋᑦ ᑕᑯᒃᓴᐅᑎᑦᑎᔪᓐᓇᓚᐅᕋᒪ ᐃᑭᐊᖅᑭᕕᒃᑯᑦ ᑕᑯᒃᓴᐅᑎᑦᑎᔪᑦ ᐃᓕᓐᓂᐊᖅᑎᔾᔪᑎᒋᒐᓱᑦᑕᒻᓂᒃ.  ᐃᑲᔪᕐᓂᖃᕕᔾᔪᐊᖅᑐᖅ ᐃᓕᓐᓂᐊᖅᑎᖁᑎᒻᓄᑦ ᐅᕙᒻᓄᓪᓗ.

ᐱᐅᔪᒻᒪᕆᐊᓗᒃ − ᐃᓚᖏᑦ ᐃᓕᓐᓂᐊᕈᑎᒃᓴᑦ ᐱᔭᕇᖅᑕᐅᔪᓐᓇᒻᒪᕆᑦᑐᑦ ᐱᐅᓯᕚᓪᓕᖅᓯᒪᓂᖓᓄᑦ ᐃᑭᐊᖅᑭᔾᔪᑎᕗᑦ.  ᐃᓕᓐᓂᐊᕈᑎᒃᓴᑦ ᐊᖏᕐᕋᒥ ᑲᒪᒋᔭᐅᔭᕆᐊᓖᑦ ᐱᐅᓂᖅᓴᓂᑦ ᐱᓕᕆᐊᖃᒻᒪᕆᓕᖅᑐᑦ ᐃᓕᓐᓂᐊᖅᑏᑦ.

ᐱᐅᓯᕚᓪᓕᖅᓯᒪᔪᖅ ᑲᓱᖅᓯᒪᓂᖏᑦ ᓄᓇᕗᑉ ᐃᓕᓐᓂᐊᕐᕕᓕᒫᖏᓐᓂ ᐃᓕᓴᕆᔭᐅᓕᓚᐅᖅᑐᖅ ᒪᕐᕉᒃ ᐊᕐᕌᒎᒃ ᐊᓂᒍᖅᓯᒪᓕᖅᑎᓪᓗᒋᑦ.  ᐅᖃᓕᒫᕐᓗᒋᑦ ᑕᒪᐃᓐᓂᑦ ᐅᖃᐅᓯᒥᓂᐅᔪᑦ ᐅᕙᓂ ᐃᓕᓐᓂᐊᕐᕕᓂᑦ ᑲᓱᖅᑎᑦᑎᓂᖅ ᐱᓕᕆᐊᖅ.