Projects
ᓄᓇᕘᒥ ᐃᑭᐊᖅᑭᔾᔪᑎᓕᕆᓂᕐᒧᑦ ᐱᓕᕆᔩᑦ ᑲᑎᒪᔨᖏᑦ

Sivumuuqpallianiq, Moving Forward: strengthening our self-reliance in the information age

ᓄᓇᕘᒥ ᐃᑭᐊᖅᑭᔾᔪᑎᓕᕆᓂᕐᒧᑦ ᐱᓕᕆᔩᑦ ᑲᑎᒪᔨᖏᑦ ᐋᖅᑭᒃᑕᐅᓚᐅᖅᓯᒪᕗᑦ ᓄᓇᕗᑦ ᒐᕙᒪᖏᓐᓄᑦ ᐃᑯᐱᒡᕕᓕᕆᔨᒃᑯᓐᓂᑦ ᕖᕝᕗᐊᕆ 2001-ᖑᑎᓪᓗᒍ.  ᑲᑎᒪᔨᖏᑦ ᐊᑐᓕᖁᔨᓚᐅᕐᒪᑕ ᐊᒥᓱᓂᑦ ᑐᑭᒧᐊᕈᑎᒋᔭᐅᖁᓪᓗᒋᑦ ᐃᑭᐊᖅᑭᔾᔪᑎᓕᕆᓂᖅ ᐱᕙᓪᓕᐊᖁᓪᓗᒍ ᓄᓇᕗᒥ, ᐊᒻᒪᓗ ᑲᑎᒪᔨᐅᖃᑕᐅᔪᑦ ᐅᑯᐊᖑᓚᐅᕆᓪᓗᑎᑦ ᓇᒻᒥᓂᖁᑎᓖᑦ, ᒐᕙᒪᒃᑰᙱᑦᑐᖅ ᑲᑐᔾᔨᖃᑎᒌᑦ, ᐊᒻᒪᓗ ᓄᓇᕗᑦ ᒐᕙᒪᖏᑦ.

ᐱᓇᓱᐊᒐᕆᓗᐊᙳᐊᓚᐅᖅᑕᖓ ᑲᑎᒪᔩᑦ ᐅᖃᐅᔾᔨᒋᐊᖅᑎᐅᓪᓗᑎᑦ ᐊᑐᓕᖁᔨᓗᑎᓪᓗ ᐃᑭᐊᖅᑭᔾᔪᑎᓕᕆᓂᕐᒧᑦ ᐱᔾᔪᑎᐅᔪᓂᒃ ᐊᑦᑐᐃᓂᖃᖅᑐᑦ ᓄᓇᕗᒥ, ᐊᒻᒪᓗ ᐃᑲᔪᖅᑐᑎᑦ ᐅᐸᓗᖓᐃᔭᖅᑕᐅᓂᖏᓐᓂᑦ ᐅᓂᒃᑳᑦ ᐊᒻᒪᓗ ᑭᐅᔾᔪᑎᖏᑦ ᑲᓇᑕᒥ ᐃᑭᐊᖅᑭᔾᔪᑎᓕᕆᓂᕐᒧᑦ ᐱᓕᕆᔩᑦ ᑲᑎᒪᔨᖏᓐᓄᑦ, ᐋᖅᑭᒃᑕᐅᓚᐅᖅᓯᒪᓪᓗᓂ ᒐᕙᒪᑐᖃᒃᑯᓐᓄᑦ ᐊᒃᑑᕝᕙ 2000−ᖑᑎᓪᓗᒍ.

ᑲᑎᒪᔨᖏᑦ ᑲᑎᓚᐅᖅᓯᒪᔪᑦ ᐊᒥᓱᐊᖅᑎᖅᑐᑎᑦ 2001-ᖑᑎᓪᓗᒍ, ᐃᒃᓯᕙᐅᑕᕆᔭᐅᓪᓗᓂ ᐃᐊᑦ ᒪᒃᑲᓇ ᐃᑯᐱᒡᕕᓕᕆᔨᒃᑯᓐᓂᑦ, ᐱᔾᔪᑎᓂᑦ ᑲᒪᓪᓗᑎᑦ ᓲᕐᓗ ᐃᑭᐊᖅᑭᔾᔪᑎᖃᕈᓐᓇᕐᓂᖏᑦ ᓄᓇᓖᑦ ᓇᒻᒥᓂᖅᓱᕐᓂᖅᓴᐅᖁᓪᓗᒋᑦ, ᐊᑦᑐᐃᓂᖃᕐᓂᖏᑦ ᐃᓕᖅᑯᓯᕐᒧᑦ, ᐱᕙᓪᓕᐊᒍᑎᒋᔭᐅᔪᓐᓇᕐᓂᖏᑦ ᑮᓇᐅᔭᓕᐅᖅᑐᖃᕐᓗᓂ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓕᓐᓂᐊᕐᓂᕐᒧᓪᓗ ᐊᑦᑐᐃᓂᖃᕈᓐᓇᕐᓂᖏᑦ.  ᑲᑎᒪᔨᐅᔪᑦ ᑖᒃᑯᐊ ᐱᓕᕆᔩᑦ ᐋᖅᑭᓚᐅᖅᑐᑦ 25−ᖑᔪᓂᑦ ᐊᑐᓕᖁᔭᖏᓐᓂᑦ ᐊᑐᐃᓐᓇᐅᒪᖁᓪᓗᒍ ᐃᑭᐊᖅᑭᔾᔪᑎ ᓄᓇᕗᒥ.

ᑲᑎᒪᔨᐅᔪᑉ ᐊᑐᓕᖁᔭᖏᑦ ᐱᖃᓯᐅᔾᔨᓚᐅᖅᑐᑦ ᑭᖑᓪᓕᖅᐹᕐᒥ ᐅᓂᒃᑳᖓᓂᒃ ᑲᑎᒪᔩᑦ ᓴᖅᑭᖅᑎᑕᐅᓚᐅᖅᓯᒪᓪᓗᓂ 2002-ᖑᑎᓪᓗᒍ, ᑕᐃᔭᐅᔪᖅ ᓯᕗᒧᐊᖅᐸᓪᓕᐊᓂᖅ, ᓯᕗᒧᐊᑉᐸᓪᓕᐊᓂᖅ: ᓴᙵᑦᑎᑦᑎᓂᕗᑦ ᓇᒻᒥᓂᖅᓱᕈᓐᓇᕐᓂᑦᑎᓐᓂᑦ ᑐᑭᓯᒋᐊᕈᑎᓂᒃ ᐊᑐᐃᓐᓇᐅᒪᕕᐅᖃᑦᑕᓕᖅᑎᓪᓗᑕ ᖃᕋᓴᐅᔭᒃᑯᑦ.  ᐅᓂᒃᑲᖅ ᑐᑭᒧᐊᕈᑎᒋᔭᐅᓚᐅᖅᓯᒪᕗᖅ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐊᒻᒪᓗ ᐱᓇᓱᐊᖅᑕᖏᑦ ᑐᙵᕕᖏᑦ ᓴᖅᑭᑕᐅᓚᐅᖅᓯᒪᒋᓪᓗᑎᑦ.

ᐃᑯᐱᒡᕕᓕᕆᔨᒃᑯᑦ, ᓄᓇᕗᑦ ᒐᕙᒪᖏᓐᓂᑦ, ᑮᓇᐅᔭᖃᖅᑎᑦᑎᓛᖑᓚᐅᖅᐳᖅ ᑲᑎᒪᔨᓄᑦ.