Projects
ᓄᓇᕘᒥ ᓱᑲᓐᓂᖅᓴᑦ ᓄᑭᓪᓚᐅᑏᑦ ᐃᑭᐊᖅᑭᔾᔪᑎᑕᖃᕈᓐᓇᕐᒪᖔᑦ ᖃᐅᔨᓴᕐᓂᖅ

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐱᒋᐊᖅᑎᑦᑎᓚᐅᖅᓯᒪᕗᑦ ᓄᓇᕘᒥ ᓱᑲᓐᓂᖅᓴᑦ ᓄᑭᓪᓚᐅᑏᑦ ᐃᑭᐊᖅᑭᔾᔪᑎᒋᔭᒃᓴᐅᒻᒪᖔᑕ ᖃᐅᔨᓴᕈᑎᒥᒃ ᐱᑦᑎᐊᖅᓯᒪᔪᓂᒃ ᓄᑖᖑᓛᖑᔪᓂᓪᓗ ᑐᑭᓯᒋᐊᕈᑎᖃᕈᒪᓪᓗᑎᑦ ᐊᑭᒋᒐᔭᖅᑕᖏᓐᓂᑦ, ᐊᒃᓱᕈᕈᑕᐅᒐᔭᖅᑐᓂᑦ ᐃᑲᔫᑎᒋᔭᐅᒐᔭᖅᑐᓂᓪᓗ ᓱᑲᓐᓂᖅᓴᓂᑦ ᓄᑭᓪᓚᐅᑎᑖᕐᓂᕈᑎᑦ ᐃᑭᐊᖅᑭᔾᔪᑎᖏᓐᓄᑦ ᑲᓱᖅᓯᒪᓗᑎᑦ.  ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᐅᑉᐱᕈᓱᒃᑐᑦ ᓴᖅᑭᖅᑐᑦ ᖃᐅᔨᓵᕐᒥ ᐃᑲᔫᑎᖃᕋᔭᕐᒪᑕ ᐊᑐᐊᒐᓕᐅᖅᑐᖃᖅᑎᓪᓗᒍ ᐋᖅᑭᒍᑎᖏᓐᓂᒃ ᐊᑯᓂᐅᔪᒧᑦ ᑐᓴᐅᒪᖃᑎᒌᒍᑎᒃᓴᓄᑦ ᑭᙴᒪᒋᔭᐅᔪᑦ ᓄᓇᕗᒧᑦ ᐊᒻᒪᓗ ᑲᓇᑕᑉ ᐅᑭᐅᖅᑕᖅᑐᓕᒫᖓᓄᑦ.  ᖃᐅᔨᓴᖅᑐᖃᓚᐅᖅᓯᒪᓪᓗᓂ ᐅᑭᐊᒃᓵᖑᑎᓪᓗᒍ ᐅᑭᐅᒃᑯᓪᓗ 2011-ᖑᑎᓪᓗᒍ ᐊᒻᒪᓗ ᐱᔭᕇᖅᓯᒪᔪᖅ ᐅᓂᒃᑳᖅ ᓴᒃᑯᑕᒥᓂᐅᓪᓗᓂ ᐅᐱᕐᖔᖅ 2012-ᒥ.

ᓄᓇᕘᒥ ᓱᑲᓐᓂᖅᓴᑦ ᓄᑭᓪᓚᐅᑏᑦ ᐊᑐᕋᒃᓴᐅᒐᔭᕐᓂᖏᑦ ᖃᐅᔨᓵᖅ ᓇᓗᓇᐃᖅᓯᓯᒪᕗᑦ ᐋᖅᑭᓱᖅᑕᐅᓂᖏᑦ ᐊᐅᓚᑕᐅᓂᖏᓪᓗ ᓱᑲᓐᓂᖅᓴᑦ ᓄᑭᓪᓚᐅᑏᑦ ᐃᑭᐊᖅᑭᔾᔪᑎᓄᑦ ᐱᑕᖃᕈᓐᓇᕐᒪᑦ ᓄᓇᕗᒥ.  ᐊᑭᑐᔪᑦ ᐊᑭᖏᑦ ᓴᓇᔪᖃᕐᓗᓂ ᓄᓇᕗᒥ ᓄᑭᓪᓚᐅᑎᓄᑦ ᓱᑲᑦᑐᓂᑦ ᑐᙵᕕᖓ, ᐱᔨᑦᑎᕐᓗᑎᑦ 24−ᖑᔪᓄᑦ ᓄᓇᓕᓐᓄᑦ ᓄᓇᕗᒥ (ᐃᓱᒪᒋᔭᐅᓪᓗᓂ ᓴᓂᑭᓗᐊᖅ ᐊᑭᑭᓛᒃᑯᑦ ᐱᔨᑦᑎᖅᑕᐅᔪᓐᓇᕋᔭᕐᒪᑕ ᓄᓇᕕᒻᒥ ᐃᑭᐊᖅᑭᔾᔪᑎᓕᕆᕙᒃᑐᓄᑦ), ᓇᓚᐅᒃᑖᖅᑕᐅᓯᒪᕗᖅ $1.05 ᕕᓕᐊᓐ ᑮᓇᐅᔭᑦ.  ᓄᑭᓪᓚᐅᑏᑦ ᐃᑭᐊᖅᑭᔾᔪᑏᑦ ᐊᑐᐃᓐᓇᐅᓐᓂᕈᑯᑦ ᐊᕕᑦᑐᖅᓯᒪᔪᓂ ᓄᓇᓕᐸᐅᔭᖏᓐᓂᒃ (ᓲᕐᓗ ᐃᖃᓗᓐᓂ, ᐃᖃᓗᒃᑑᑦᓯᐊᖅ, ᑲᖏᖅᖠᓂᕐᓗ) ᐊᒻᒪᓗ ᖃᐅᓱᐃᑦᑐᒨᖓᑎᓪᓗᒋᑦ, ᓇᓚᐅᒃᑖᖅᑕᐅᓯᒪᕗᑦ $342 ᒥᓕᐊᓐ−ᕌᕐᓂᐊᕋᓱᒋᔭᐅᓪᓗᑎᑦ.  ᑭᓯᐊᓂᓕ, ᐅᓂᒃᑳᖅ ᑎᑎᕋᖅᓯᒪᔪᖃᖅᑐᖅ ᐅᓪᓗᒥᐅᔪᖅ ᑮᓇᐅᔭᓂᑦ ᐊᑐᖅᑐᖃᖃᑦᑕᕆᐊᖃᕐᓂᖓᓂᑦ ᖁᒻᒧᐊᑦᑎᑕᐅᓯᒪᔪᒃᑯᑦ ᐱᔨᑦᑎᖅᑐᖃᖃᑦᑕᕐᓗᓂ ᑖᒃᑯᐊ ᓄᑭᓪᓚᐅᑏᑦ ᓱᑲᓐᓂᖅᓴᑦ ᐊᑐᖅᑕᐅᒍᓐᓇᖃᑦᑕᕋᔭᕐᒪᑕ ᐋᖅᑭᒃᓯᕕᐅᓯᒪᙱᑦᑐᑦ ᓄᓇᓕᓐᓄᑦ, ᐱᔨᑦᑎᖅᑕᐅᔪᓐᓇᖁᓪᓗᒋᑦ ᐊᒻᒪᓗ ᓇᓪᓕᐅᒃᑯᒫᕆᔭᐅᔪᓐᓇᕋᔭᕐᒪᑕ ᓄᑭᓪᓚᐅᑏᑦ ᓱᕋᑲᓪᓚᑦᑐᒥᓂᐅᒍᑎᑦ.

ᐱᔭᕇᖅᓯᒪᔪᖅ ᐅᓂᒃᑳᖅ ᐊᑐᐃᓐᓇᐅᒪᕗᖅ ᐱᔭᐅᔪᓐᓇᖅᑐᓂ ᖃᕋᓴᐅᔭᒃᑯᑦ ᐅᕙᓂ:

ᓇᐃᓈᖅᓯᒪᓂᖏᑦ ᖃᐅᔨᔭᒥᓃᑦ

ᖃᕋᓴᐅᔭᓕᕆᔾᔪᑎᓂᒃ ᐱᓕᕆᐊᖃᖅᐸᑦᑐᑦ ᑕᐅᑦᑐᖏᑦ ᒪᓕᑦᑐᒋᑦ, ᐋᖅᑭᓱᖅᑕᐅᓂᖏᑦ ᐊᐅᓚᑕᐅᓂᖏᓪᓗ ᓄᑭᓪᓚᐅᑏᑦ ᓱᑲᓐᓂᖅᓴᑦ ᐃᑭᐊᖅᑭᔾᔪᑏᑦ ᓄᓇᕗᒥ ᐊᔪᕐᓇᙱᒻᒪᑦ ᐊᑐᖅᑕᐅᓗᑎᑦ ᓄᑭᓪᓚᐅᑏᑦ ᐊᑐᖅᑕᐅᖃᑦᑕᕇᖅᑐᑦ, ᐋᖅᑭᒋᐊᒐᓛᓪᓗᒋᑦ ᓱᖏᐅᑎᖁᓪᓗᒋᑦ ᓄᓇᓕᑦ ᖃᓄᐃᑦᑑᓂᖏᑦ ᒪᓕᓪᓗᒋᑦ.  ᑕᐃᒪᐃᑦᑐᖃᕐᓂᕈᓂ ᐱᐅᙱᑦᑐᑦ ᓴᖅᑭᕈᓐᓇᕆᕗᑦ ᐊᒻᒪᓗ ᐊᒥᓱᑦ ᐱᔾᔪᑏᑦ ᓇᓗᓇᐃᖅᑕᐅᓯᒪᕗᑦ ᐅᑯᐊᖑᓪᓗᑎᑦ:

  • ᐱᑦᑎᐊᖅᓯᒪᔪᓂᑦ ᐊᒻᒪᓗ ᓄᑖᖑᓛᕐᓂᑦ ᐃᒪᑉ ᓄᓇᓗ ᑐᑭᓯᒋᐊᕈᑎᓂᑦ ᐱᑕᖃᕆᐊᓕᒃ ᓇᓗᓇᐃᖅᑕᐅᖁᓪᓗᒋᑦ ᐃᖅᑲᒃᑯᑦ ᑲᐃᕗᖏᑦ ᐊᒻᒪᓗ ᐃᒪᕐᒦᙶᖓᓗᑎᑦ ᓄᓇᒨᖅᐸᓪᓕᐊᓂᖏᑦ ᖃᓄᐃᓕᖓᒐᔭᕐᒪᖔᑕ
  • ᐊᕙᑎᓕᕆᓂᕐᒧᑦ ᕿᒥᕐᕈᐅᔪᖃᕐᓗᓂ ᐊᒻᒪᓗ ᐊᑐᕋᒃᓴᐅᔪᑦ ᓱᑯᑦᑎᐊᒎᖓᒐᔭᕐᓂᖏᑦ ᐊᖏᖅᑕᐅᓯᒪᔭᕆᐊᖃᕋᔭᕐᒥᒻᒪᑕ ᑕᒪᒃᑯᐊ ᐊᑐᖅᑕᐅᔪᒪᔾᔪᑎᖏᑦ ᐊᖏᖅᑕᐅᕙᓪᓕᐊᓕᕐᓗᑎᑦ
  • ᐊᕐᕌᒍᑉ ᐃᓚᐃᓐᓇᖓᒍᑦ ᓴᓇᕕᒃᓴᐅᓂᖓ ᐊᒻᒪᓗ ᐊᓯᔾᔨᖅᐸᓪᓕᐊᓂᖏᑦ ᓯᑯᑉ ᖃᓄᐃᑦᑑᓂᖏᑦ
  • ᐊᑯᓂᐅᔪᒧᑦ ᐋᖅᑭᐅᒪᑎᑕᐅᖃᑦᑕᕆᐊᖃᕋᔭᕐᓂᖏᑦ ᐊᒻᒪᓗ ᓴᓇᔭᐅᔪᖃᕆᐊᖃᕐᓂᕈᓂ ᖃᓄᐃᓕᐅᕋᔭᕐᒪᖔᑕ ᐸᕐᓇᐅᑎᓕᐅᖅᓯᒪᓗᑎᑦ, ᐱᖃᓯᐅᑎᓗᒍ ᓇᓪᓕᐅᒃᑯᒫᖃᕐᓗᑎᑦ ᓱᕋᒃᓯᒪᑯᑖᑦᑐᖃᖅᑐᒥᓂᐅᑉᐸᑦ.

ᐅᓂᒃᑳᖅ ᐅᖃᖅᓯᒪᒋᕗᖅ ᐊᔾᔨᒌᙱᑦᑐᓂᒃ ᑲᓱᖅᓯᒪᔾᔪᑎᖃᕆᐊᖃᕐᓂᖏᑕ ᓴᓇᔭᐅᔭᕆᐊᖃᕐᓂᖏᑦ ᓲᕐᓗ ᓱᕋᑦᑕᐃᓕᖁᓪᓗᒋᑦ, ᐊᑐᖅᑕᐅᓂᖓ ᑐᙵᕕᖓᑕ ᓄᑭᓪᓚᐅᑎᖃᕐᕕᑉ, ᓱᑯᑦᑎᐊᒎᖓᓂᖏᑦ ᓄᑭᓪᓚᐅᑏᑦ ᐊᔾᔨᒌᙱᑦᑐᒡᒍᑕᐅᓂᖓᑕ, ᐊᑐᖅᑕᐅᓂᖏᑦ ᐅᐃᒍᖏᑕ ᐊᒻᒪᓗ ᐊᑐᖅᑕᐅᓂᖏᑦ ᐊᓯᖏᑦ ᖃᕋᓴᐅᔭᒃᑰᖓᔪᑦ ᓇᓪᓕᐅᒃᑯᒫᖑᓗᑎᑦ.

ᓇᓖᕌᕋᒃᓴᖅᑕᖃᕆᐊᖃᕐᒥᔪᑦ ᐊᔾᔨᒌᙱᑦᑐᒡᒍᑕᐅᔪᓂᑦ ᑐᓴᐅᒪᖃᑎᒌᒍᑎᓂᒃ ᐱᑕᖃᕆᐊᖃᕐᓂᖓᓂᒃ ᓄᓇᕗᒥ ᐊᒻᒪᓗᑦᑕᐅᖅ ᐃᓅᓯᕐᒧᑦᑮᓇᐅᔭᓕᐅᕈᑎᖃᕈᓐᓇᐅᑕᐅᒍᓐᓇᕐᓂᖏᑕᓗ ᐃᓱᒪᒃᓴᖅᓯᐅᕈᑎᒋᔭᐅᓗᑎᑦ ᐊᔾᔨᒌᙱᑦᑐᓄᑦ ᖃᕋᓴᐅᔭᓕᕆᔾᔪᑎᓂᑦ ᐱᑕᖃᕐᓂᕈᓂ. ᐱᖃᓯᐅᔾᔨᕗᑦ ᖃᕋᓴᐅᔭᖅᑎᒍᑦ ᑲᓱᖅᓯᒪᒍᓐᓇᕐᓂᖏᑕ ᐊᔾᔨᒌᙱᓗᐊᕋᔭᕐᓂᖏᑦ ᓄᓇᓖᑦ, ᖄᖓᒍᒃᑲᓐᓂᖅ ᑮᓇᐅᔭᓂᒃ ᐊᑐᕆᐊᓖᑦ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐊᔪᕐᓇᖁᓇᒍ ᐃᑭᐊᖅᑭᔾᔪᑎᒥᒃ ᐊᑐᕐᓗᓂ ᓄᑭᓪᓚᐅᑎᖃᙱᑦᑐᓄᑦ ᖃᕋᓴᐅᔭᓕᕆᔾᔪᑎᓄᑦ ᓄᓇᓖᑦ ᐊᒻᒪᓗ ᐃᓱᒪᒋᔭᐅᔭᕆᐊᖃᕐᓂᖏᑦ ᐊᐅᓚᑕᐅᓂᒃᓴᖓᑕ ᐊᔾᔨᒌᙱᑦᑐᒡᒍᑏᑦ ᐱᔨᑦᑎᕋᕈᑎᖏᑦ ᓲᕐᓗ ᓄᑭᓪᓚᐅᑎᑎᒍᑦ ᐃᑭᐊᖅᑭᔾᔪᑎᓖᑦ ᐊᒻᒪᓗ ᖁᒻᒧᐊᑦᑎᑕᐅᓯᒪᔪᖅᑎᒍᑦ ᐃᑭᐊᖅᑭᔾᔪᑎᓖᑦ ᓄᓇᓖᑦ ᖃᐅᔨᒪᓇᑦᑎᐊᖁᓪᓗᒍ ᐃᓅᕐᓯᖃᑦᑎᐊᕐᓂᕐᒧᑦ−ᑮᓇᐅᔭᓕᐅᕈᑎᖃᕐᓂᕐᒧᓪᓗ ᐊᔪᕐᓇᙱᓐᓂᖅᓴᐅᖁᓪᓗᒍ ᑕᒪᐃᓐᓄᑦ ᓄᓇᕗᒧᑦ.  ᑎᓴᒪᑦ ᐊᑐᓕᖁᔭᐅᔪᑦ ᐊᖅᑭᒃᑕᐅᓯᒪᕗᑦ ᑲᒪᒋᔭᐅᒐᔭᕐᓂᑦ ᐃᓅᓯᖃᑦᑎᐊᕐᓂᕐᒧᑦ−ᑮᓇᐅᔭᓕᐅᕈᑎᖃᑦᑎᐊᕐᓂᕐᒧᓪᓗ ᐃᓱᒪᒋᒋᐊᖅᑕᐅᔭᕆᐊᓖᑦ ᐅᑯᐊᖑᓪᓗᑎᑦ ᐊᑐᖁᔭᐅᔪᑦ:

  • ᑮᓇᐅᔭᓂᑦ ᐊᑐᖅᑐᖃᕐᓗᓂ ᐱᖁᑎᕐᔪᐊᓕᐅᖅᑐᖃᖁᓪᓗᒍ ᐃᑲᔪᕐᓂᖃᕋᔭᖅᑐᓂᒃ ᑕᒪᐃᓐᓂᑦ ᓄᓇᕗᒥᐅᓂᑦ ᐃᑲᔪᕐᓂᖃᕋᔭᕐᒥᒻᒪᑦᑕᐅᖅ ᑕᒪᓐᓇ ᑲᓇᑕᓕᒫᕐᒧᑦ
  • ᑕᑎᒋᔭᒃᓴᐅᓗᓂ ᐊᒻᒪᓗ ᐊᔾᔨᒌᑦᑐᒡᒍᑕᐅᓗᑎᑦ ᑲᓱᖅᓯᒪᓂᕆᔪᓐᓇᕐᓂᖏᑦ ᑕᒪᓐᓇᓗ ᐱᒻᒪᕆᐅᓛᖑᓪᓗᓂ
  • ᐸᕐᓇᐅᑎᓕᐅᖅᓯᒪᔪᖃᕐᓗᓂ ᑮᓇᐅᔭᖅᑎᒍᑦ ᐊᔪᕐᓇᕋᔭᙱᒻᒪᑦ ᖁᒻᒧᐊᑦᑎᑕᐅᓯᒪᔪᖅᑎᒎᖓᔪᖃᖁᓪᓗᒍ
  • ᓯᕗᓂᒃᓴᒧᑦ ᑮᓇᐅᔭᓕᐅᕈᓐᓇᕆᐊᖃᕐᓂᖏᑦ ᐋᖅᑭᐅᒪᔾᔪᑎᓄᑦ ᖃᓄᖅᑑᕈᑎᓄᓪᓗ

ᓴᓪᑐᕐ ᓄᓇᕐᔪᐊᕐᒥ ᖃᐅᔨᒪᔩᑦ ᑎᒥᖓ ᓵᓚᒃᓴᓚᐅᖅᓯᒪᔪᑦ ᐊᑭᑦᑐᕋᐅᑎᑎᑦᑎᓪᓗᑕ ᐃᓄᓐᓂᑦ ᑭᒃᑯᑐᐃᓐᓇᕐᓂᑦ ᐱᓕᕆᐊᖃᖁᔨᓪᓗᑕ.  ᓵᓚᒃᓴᓚᐅᖅᑎᓪᓗᒋᑦ, ᑖᒃᑯᐊ ᓴᓪᑐᕐ ᓄᓇᕐᔪᐊᕐᒥ ᖃᐅᔨᒪᔩᑦ ᑎᒥᖓ ᑳᑐᓐᕌᒃᑦ−ᓯᒃᑲᓐᓂᓕᓚᐅᖅᓯᒪᔪᑦ ᓕᐊᑦᑯᐊᕐ ᐱᖁᑎᕐᔪᐊᓕᕆᔨᒃᑯᑦ ᐱᔨᑦᑎᕋᖅᑏᑦ ᐊᒻᒪᓗ ᐃᒪᐃᑦᑐᖅ ᑎᒥᖓᓂᒃ.

ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᕿᒥᕐᕈᓯᒪᕗᑦ ᐊᖏᖅᓯᒪᓪᓗᑎᓪᓗ ᐅᓂᒃᑳᕐᒥ ᐅᑉᐱᕈᓱᓐᓂᖏᓐᓄᑦ ᐊᑑᑎᖃᕋᔭᕐᒪᑦ ᐊᑐᐊᒐᓕᐅᖅᑐᖃᓕᖅᑎᓪᓗᒍ ᓯᕗᓂᒃᓴᒥ.  ᑭᓯᐊᓂᓕ, ᐊᑐᓕᖁᔭᐅᔪᑦ ᐊᒻᒪᓗ ᐃᓱᒪᓕᐅᕈᑕᐅᓯᒪᔪᑦ ᑕᐃᒃᑯᓄᖓ ᑎᒥᐅᔪᓄᑦ ᖃᐅᔨᒪᔨᓄᑦ ᐋᖅᑭᓱᖅᑕᐅᓯᒪᔪᑦ ᐅᐸᓗᖓᐃᔭᐃᓯᒪᒻᒪᑕ ᐅᓂᒃᑳᕐᒥᒃ.