Projects
ᐅᖓᓯᑦᑐᒃᑯᑦ ᐃᑲᔫᑎ ᑕᕐᕆᔮᒃᓴᓕᐅᕐᓂᒃᑯᑦ ᖃᕋᓴᐅᔭᒃᑯᑦ ᑲᑎᒪᔾᔪᑎᖏᑦ ᐆᑦᑐᕋᖅᑕᐅᔪᑦ ᐱᓕᕆᐊᖅ ᑐᑭᓯᐅᒪᖃᑎᒌᒍᓐᓇᖁᓪᓗᒋᑦ ᑐᓵᙱᑦᑐᑦ ᓄᓇᕗᒥᐅᑦ

Hon. Leona Aglukkaq, Dr. James MacDougall and Oana Spinu conversing with pilot project participant Clayton Ungungai via remote sign language interpreter

ᑐᑭᓯᐅᒪᖃᑎᒌᑦᑎᑕᐅᓂᖏᑦ ᑐᓵᙱᑦᑐᑦ ᓄᓇᕗᒥᐅᑦ ᖃᕋᓴᐅᔭᒃᑯᑦ ᑲᑎᒪᑎᑕᐅᔪᓐᓇᕐᓂᖏᓐᓄᑦ

ᐊᑐᖅᑕᐅᓂᖓ ᑖᓐᓇ ᖃᕋᓴᐅᔭᒃᑯᑦ ᑲᑎᒪᔾᔪᑕᐅᔾᔪᑏᑦ ᓇᓗᓇᐃᖅᑕᐅᓯᒪᕗᑦ ᐱᐅᔪᐊᓘᒋᐊᖏᓐᓂᑦ ᑐᓵᙱᑦᑐᑦ ᐱᔨᑦᑎᖅᑕᐅᔪᓐᓇᖁᓪᓗᒋᑦ ᐊᒻᒪᓗ ᐃᓅᖃᑎᖃᖁᓪᓗᒋᑦ, ᑭᓯᐊᓂᓕ ᓯᕗᓪᓕᖅᐹᖑᒻᒪᑦ ᑕᒪᓐᓇ ᖃᐅᔨᓴᖅᑕᐅᓚᐅᖅᓯᒪᔪᖅ ᓄᓇᕗᒥ ᑕᐃᒪᓐᓇᑎᒋ.  ᖃᖓᓕᒫᒃᑯᑦ ᐃᓄᐃᑦ ᑭᙴᒪᒋᔭᖏᑦ ᐊᑐᐃᓐᓇᐅᒪᑎᑕᐅᔪᓐᓇᙱᒃᑲᓗᐊᖅᑎᓪᓗᒋᑦ, ᐆᑦᑐᕋᐅᑎᐅᔪᖅ ᑕᑯᒃᓴᐅᑎᑦᑎᓯᒪᕗᖅ, ᖃᕋᓴᐅᔭᒃᑯᑦ ᑲᑎᒪᑎᑕᐅᔪᓐᓇᕈᑏᑦ ᓲᕐᓗ ᑕᕐᕆᔮᒃᓴᓕᐅᕈᑎᒃᑯᑦ ᐅᖄᓚᐅᑎ ᐊᑐᖅᑕᒥᓂᐅᔪᖅ ᑖᔅᓱᒪᑎᒍᑦ ᐱᓕᕆᐊᒃᑯᑦ, ᑐᓵᙱᑦᑐᑦ ᓄᓇᕗᒥᐅᑦ ᐊᑐᕈᓐᓇᕐᒪᑕ ᐊᔾᔨᒌᑦᑐᓂᒃ ᑐᓴᐅᒪᖃᑎᒌᒍᑎᓂᑦ ᐊᑐᖅᑕᐅᔪᓐᓇᖅᑐᓂᑦ ᐊᔾᔨᖏᓐᓂᒃ ᐃᓄᓐᓄᑦ ᑐᓵᔪᓄᑦ.  ᐊᒻᒪᓗ ᐊᑐᐃᓐᓇᐅᒪᑎᑦᑐᒋᑦ ᑕᒪᒃᑯᐊ ᖃᕋᓴᐅᔭᖅᑎᒍᑦ ᑲᑎᒪᔾᔪᑏᑦ ᑐᓵᙱᑦᑐᓄᑦ ᓄᓇᕗᒥᐅᖑᔪᓂᑦ ᐃᓅᖃᑎᒋᔭᐅᔪᓐᓇᕐᒪᑕ ᑲᓇᑕᒥᐅᑕᓄᓪᓗ.

ᐆᑦᑐᕋᖅᑕᐅᓂᖅ ᑕᒪᓐᓇ ᓴᖅᑭᖅᑎᑕᐅᓚᐅᖅᓯᒪᔪᖅ ᓄᕖᕝᕙ 2012-ᖑᑎᓪᓗᒍ ᐊᒻᒪᓗ ᑲᔪᓯᔪᒥᓂᐅᓪᓗᓂ ᒫᑦᓯ 31, 2013-ᕈᕋᓱᐊᕐᓂᖓᓄᑦ.  ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓ ᖁᕕᐊᓱᒻᒪᕆᓚᐅᖅᑐᑦ ᐱᓕᕆᖃᑎᖃᕈᓐᓇᕆᐊᖏᓐᓂᒃ ᑖᒃᑕ ᔭᐃᒥᓯ ᒪᒃᑑᒍᓪ−ᒥ ᑲᓇᑕᒥ ᑐᓵᙱᑦᑐᓄᑦ ᖃᐅᔨᓴᕐᕕᒃ ᐱᓕᒻᒪᒃᓴᐃᕕᓪᓗ ᑎᒥᖓ, ᐃᖅᑲᓇᐃᔭᖃᖃᑦᑕᕐᓂᑰᓕᖅᑐᖅ ᐊᑯᓂ ᓄᓇᕗᑉ ᑐᓵᙱᑦᑐᓂᑦ ᐃᓄᓐᓂᑦ.  ᑖᒃᑕ ᒪᒃᑑᒍᓪ ᐃᑲᔪᖅᓯᒪᓕᖅᑐᖅ ᓇᓗᓇᐃᖅᓯᓗᓂ ᐃᓚᐅᖃᑕᐅᔪᒃᓴᓂᑦ ᓄᓇᕗᒥ.

ᐱᕙᓪᓕᐊᔪᓕᕆᔨᒃᑯᓐᓄᑦ ᑲᑎᒪᖃᑎᖃᓚᐅᖅᑐᑦ ᐄᐳᕈᓪ 10-ᖑᑎᓪᓗᒍ ᐆᑦᑐᕋᐅᑎᐅᔪᖅ ᐱᓕᕆᐊᖅ ᐱᓪᓗᒍ.  ᑲᑎᒪᖃᑎᖃᖅᑎᓪᓗᒋᑦ ᑕᑯᒃᓴᐅᑎᑦᑎᔪᓐᓇᓚᐅᖅᑐᑦ ᐅᖓᓯᑦᑐᒃᑯᑦ ᑐᓵᙱᑦᑐᓄᑦ ᑎᒥᒃᑯᑦ ᐆᑦᑐᕋᕐᓂᕐᒧᑦ ᑐᑭᓯᔭᐅᔾᔪᑎᖏᓐᓂᑦ ᖃᕋᓴᐅᔭᒃᑯᑦ.  ᐊᖓᔪᖅᑳᖅ ᓕᐅᓇ ᐊᒡᓗᒃᑲᖅ ᓂᓪᓕᐊᓚᐅᖅᑐᖅ ᑭᒡᒐᖅᑐᐃᓪᓗᓂ ᒐᕙᒪᑐᖃᒃᑯᓐᓂᑦ, ᐅᐊᓇ ᔅᐲᓄ ᐅᖃᓪᓚᒃᑐᓂ ᑭᒡᒐᖅᑐᐃᓪᓗᓂ ᓄᓇᕘᒥ ᓱᑲᑦᑐᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔩᑦ ᑎᒥᖓᓂᑦ, ᐊᒻᒪᓗ ᑖᒃᑕ ᔭᐃᒥᓯ ᒪᒃᑑᒍᓪ ᐅᖃᓪᓚᑦᑐᓂ ᑭᒡᒐᖅᑐᖅᑐᓂᒋᑦ ᑲᓇᑕᒥ ᑐᓵᙱᑦᑐᓄᑦ ᖃᐅᔨᓴᕐᕕᒃ ᐱᓕᒻᒪᓴᕐᕕᓪᓗ.  ᑐᑭᒧᐊᑦᑎᑦᑎᔨᖓ ᓄᓇᕗᒥ ᐊᔪᕈᑎᓖᑦ ᒪᑭᓐᓇᓱᐊᖅᑏᑦ ᑲᑐᔾᔨᖃᑎᒌᖏᑦ, ᕕᐊᓐᑎ ᐊᐃᕆᓚᑦ, ᐱᖃᑕᐅᓚᐅᕐᒥᔪᖅ.  ᐱᕙᓪᓕᐊᔪᓕᕆᔨᓂᑦ ᑲᑎᒪᖃᑎᖃᖅᑐᑎᑦ ᐊᒻᒪᓗ ᐆᑦᑐᕋᖅᑐᑎᑦ ᑕᑯᒃᓴᐅᑎᑦᑎᓪᓗᑎᑦ ᖃᓄᐃᓕᐅᕈᑕᐅᒍᓐᓇᕐᓂᖓᓂᒃ ᑕᒪᓐᓇ, ᐆᑦᑐᕋᐅᑎᐅᔪᖅ ᐱᓕᕆᐊᖅ ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᔭᐅᔪᒪᔪᒻᒪᕆᐅᓚᐅᖅᑐᖅ ᓴᖅᑭᔮᖅᑎᑕᐅᑦᑎᐊᓕᖅᑐᓂᓗ ᑎᑎᕋᖅᓯᒪᓂᖏᑎᒍᑦ ᑕᓚᕖᓴᒃᑯᓪᓗ ᑕᑯᒃᓴᐅᑎᑕᐅᓪᓗᓂ. ᐱᓕᕆᐊᖅ ᐃᓕᓴᕆᔭᐅᓯᒪᕗᖅ ᒪᓕᒐᓕᐅᕐᕕᑉ ᐃᓗᐊᓂ ᐊᖓᔪᖅᑳᖅ ᒥᔅᑕ ᐊᐅᐸᓗᒃᑐᒧᑦ, ᒪᓕᒐᓕᐅᖅᑎ ᖃᒪᓂ’ᑐᐊᕐᒧᑦ, ᐅᖃᐅᓯᕆᓚᐅᖅᑐᓂᐅᒃ ᒪᐃ 7-ᒥ ᒪᓕᒐᓕᐅᖅᑏᑦ ᐅᖃᐅᓯᖃᖅᑎᓪᓗᒋᑦ ᑲᑎᒪᑎᓪᓗᒋᑦ:

ᐱᓕᕆᐊᑦ ᓲᕐᓗ ᑖᔅᓱᒪᑎᑐᑦ ᑕᑯᒃᓴᐅᑎᑦᑎᕗᑦ ᐱᒻᒪᕆᐊᓗᒻᒥᒃ ᓯᕗᒧᐊᑉᐸᓪᓕᐊᓂᕐᒥᒃ ᐃᓄᓕᒫᓂᑦ ᐃᓚᐅᖃᑕᐅᑎᑦᑎᓗᓂ ᐊᒻᒪᓗ ᑐᙵᓱᐊᑎᑦᑎᓗᓂ ᑕᒪᐃᓐᓄᑦ ᐃᓄᖁᑎᑦᑎᓐᓄᑦ.

ᐆᑦᑐᕋᕈᑎ ᐱᓕᕆᐊᖅ ᐱᒋᐊᖅᑎᑕᐅᓚᐅᖅᓯᒪᒻᒪᑦ ᐃᓕᖅᑯᓯᓕᕆᔨᒃᑯᑦ ᑭᓇᐅᔭᖃᖅᑎᑦᑎᓪᓗᑎᑦ CDRTI−ᒃᑯᓪᓗ ᓴᙵᑦᑎᑕᐅᖁᓪᓗᒍ ᑐᑭᓯᐅᒪᖃᑎᒌᓐᓂᖏᑦ ᐃᓄᐃᑦ ᑐᑭᓯᐅᒪᖃᑎᒌᒍᓯᖏᑦ ᑐᓵᙱᑦᑐᓄᑦ ᐊᒻᒪᓗ ᑎᑎᕋᖅᑕᐅᓗᑎᑦ ᑐᑭᓯᐅᒪᖃᑎᒌᒍᓯᖃᐅᕐᒪᑕ ᐊᒻᒪᓗᑦᑕᐅᖅ ᑐᑭᓯᔭᐅᓗᑎᑦ ᐊᕕᑦᑐᖅᓯᒪᔪᓂᑦ ᐊᔾᔨᒌᙱᑦᑐᑦ ᐆᑦᑐᕋᐅᓯᖏᑦ. ᑕᒪᓐᓇ ᐱᓕᕆᐊᖅ ᑕᐃᒪᐃᒻᒪᑦ ᐃᓗᐊᓃᑉᐳᖅ ᐱᖁᑎᕐᔪᐊᓕᕆᓂᖅ II ᐱᓕᕆᐊᖓᓄᑦ ᐋᓐᓂᐊᖅᑕᐃᓕᓂᕐᒥᑦ, ᑐᑭᓯᐅᒪᖃᑎᒌᓐᓂᕐᒥᒃ, ᐊᒻᒪᓗ ᓴᙵᑦᑎᓪᓗᒋᑦ ᓄᓇᓖᑦ ᑲᓱᖅᓯᒪᓂᖃᑦᑎᐊᖁᓪᓗᒋᑦ.